Jowai: Ynne ka sngi u President ka BJP hapoh ka ri u Amit Shah da wan hiar u ha Jowai wow yalap neibynta ka party ha kani ka Election MLA hapoh ka jylla, heiwa da emlang u Montri Khynnah ka sorkar pyrdi u Alphons Kannanthanam wa ki kyrtong ka party na ki 7 tylli ki Constituency ka ri-loom Jaiñtia.
U Alphons hei klam da ong u wa iwa da leh ka sorkar u Modi neibynta ki khian paaid hapoh ki le snem da ryngkat i wa iwa da leh ka sorkar Congres 15 snem.
Da ong u wa ki paidbah da chah tooh ka poisa yong ki hapoh ka sorkar Congress neibhah wa ka poisa wa phah na ka sorkar pyrdi neibynta ki kaam pynroi ym em u pynkrehkaam hiwot ya ka.
Heijooh i por da ong u wa hapoh ka ri India ym em iwi wot leh i kaam wa man pyrchah ya ki khian paid khamtam ya ki Kristan heiwa oo leh toh u Kristan.
U Amit Shah hei klam da ong u wa u Dr. Mukul Sangma ym em iwon iwon i kaam wa da leh u lait noh na i kaam tooh hapoh ka jylla.
Da kyntu u leh ya waroh wow jied ki ya ka BJP wow ye u synchaar ya ka jylla deiwa kular wa lada poi ko hei bor daw wai biang ko ya i khih mooyong.
Chooh chooh da ong u wa ka sorkar pyrdi hapoh ka UPA ha ka 13th Finance da pyllait ko du T. 5,800 klur neibyna ka jylla katwa ka sorkar NDA ha ka 14th Finance da pyllait ko hadooh T. 25,000 Klur.
Da ong u wa ka sorkar pyrdi da e mynkna ko leh ya ki kum LPG cha ki 30,000 ngut ki manbei wei da mang wow booh hadooh T. 10,000 Klur neibynta wow e yarap hawa chah sumaar wei da mang wow e T. 5 lak samen hawa chah sumaar ki bru.
Chooh chooh da beiñ biang u ya u Dr. Mukul Sangma wa man u u montri rangbah u wym bien u kreh.
Discussion about this post