U Wandonbok Jyrwa, President yong ka East Khasi Hills Local Taxi Welfare Association (EKHLTWA) da pynsñiaw u yei wym sñiaw yahaap yeiwa phah ka sorkar ya waroh kiwa kamai Taxi wa hap ki wow wah ID wa em yei pyrtuid, i thaw sah, i Number kari wa Driver License khnang wow wanrah yei chngaaiñ ya kiwa chong kari kamai.
Hawa klam wa kiwa kiwa toh khubor ynne ka sngi, u Wandonbok da ong u wa lada ka sorkar kwah ko wow chngaaiñ ki paidbah wa lai wa wan, toh u booh ki da ki pulit 24×7. Da ong bu wa ka aiñ toh neibynta waroh kiwa yah kari hapoh ri India tangwa u chna aiñ du ya kiwa yah kari hapoh jylla Meghalaya, kam ka seiñ ym sñiaw yahaap ko.
Da kyntu u leh ya kiwa lai wa wan wym toh u tieñ ki hawa chong Taxi neidaw wa ki Taxi ym jooh lai jngai ki palat ya ka 6 Km wei da ong u leh wa ka seiñ daw pait ko ya ka Notification manda pynmih ka sorkar wa ha kawon ka bynta lada u kynthup ko ya waroh kiwa yah kari. Chooh chooh da ong u wa lada kani ka hukum u krehkaam ko du ya kiwa yah kari ka jylla Meghalaya wei lada kamtæ da man ko pyrchah ya ka aiñ.
Da kylli u leh hajrong i ong u Paul Lyngdoh wa lada ini u krehkaam ko ya waroh kiwa kamai kari lait noh ki kari sorkar, wei lada ki kari ML01 toh ki kari kamai næ toh ki kari sorkar.
Uwi na kiwa yah kari da ong u wa ini i thmu yong ka sorkar toh wow pynboonkaam ya kiwa kamai kari wei ym sñiaw yahaap ki yeini wa da kwah ka sorkar wow leh.
Discussion about this post