U Working President ka Meghalaya Pradesh Congress Committee (MPCC), u Pynshngain N Syiem da ong u wa i jia ha ka 22 tarik uni u bnai heiwa ki pulit ka Assam da chim ki yei mynsien yong ki 5 ngut ki bru waheh i wym toh da jia ha Assam lane wa jia ha ka thaw wa em i ya kajia pood, tangwa da jia bait chapoh u pood yong ka jylla Meghalaya.
Da ong u wa itai i jia da booh yukylli leh cheiwon i chngaaiñ yong kiwa chong chnong ka jylla, neibhah lada ki pulit Assam wa ki pulit wa yang khloo ka Assam nood ki wow psiah chadooh cha pchem ka Meghalaya, iyi wow jia.
Da ong chooh chooh u wa i chong sier kiwa chong chnong ym toh de iwa thymme, tangwa ka sorkar Meghalaya dang thiah yimphoo ko wot hawa ka Assam da lai booh ko ya ka Outpost ha Mookoilum wei da booh sa kawi ka Outpost ha Saba du hapoh 10 Km i jngai.
Uwa yahkhmat ka Congress da ong u leh wa lada sai yeiwa kær wa ki kynroh soodong ka yung sah u Montri Rangbah, kammon ma-ai u sñiaw u, wei lada pyndam noh ya kiwa yang sonteri na pchem yung u Montri Rangbah, daw yoh thiah tharai ki khon u Montri Rangbah wei da pynrap chooh chooh wa ki Montri lada u chong yung ki khlem i kær kiwa sonteri.
Ka Meghalaya Pradesh Congress Committee (MPCC) da pynman ko ya ka yalang sñiawlem neibynta kiwa da khlaad noh hei chah siat yap ha ki pulit Assam ha ka 22 tarik ha ka chnong Mukroh, West Jaintia Hills District.
Ha kani ka yalang da pynman leh yei suki kiaw wa ar minit kam i dak wow kynmoo warom ya 5 ngut ki waheh wa da khlaad na ki kuli yong ki pulit Assam. Hadien ka yalang da pynman leh yei thang mombati ha pchem ka Congress Bhavan, Shillong.
Ha kani ka yalang da yoh leh yei klam uwi na kiwa yahkhmat ka Congress, wa kynthup ya u Vice President, u Ronnie V Lyngdoh, u Marbud Dkhar waka Joplin Shylla kawa man ka President yong ka Mahila Congress.
Kiwa klam ha kani ka yalang da pynsñiaw ki leh yei pynbaad da ka Assam wa ki 5 ngut kiwa chong chnong toh kiwa khayi tooh ya ki dieñ, toh kawa khlem yurim, neibhah lada toh kiwa khayi tooh, ym sah ki ha ki yung skum wa da astor dei khyndaw.
