U Montri Rangbah ka jylla, u Conrad Sangma da ong u wa ka sorkar daw leh ko yeiwa emkaam lada yoh yaka ujor wa em ka khayi mooyong pyrchah yaka aiñ.
Da ong u leh wa ka sorkar da pyntikna ko wa ki kot ki sla toh u man ki kiwa biang lada em i kit ya iwon iwon.
Hajrong wa mih i pynbaad wa em u bru wa chah kem na Assam toh uwa yajan bha wa u Montri sorkar, u James Sangma. U Conrad da ong u wa ka sorkar Assam ym em pyntip ko yeini cha ka sorkar jylla.
Da ong chooh chooh u wa kini ki jait pynbaad toh kiwa ym ye u wow jubab khlem da yoo ya ki sabut wa em ka sorkar Assam wei neiliang yong ka sorkar Meghalaya da pyntikna ko wa toh u biang ki kot ki sla lada kit ya kiwon kiwon.
Heiyatoh wa i ong ka Meghalaya High Court wym em bood ka sorkar ya ki hukum ka Supreme Court waka NGT, u Conrad da ong u wa da phah ya ki chnat sorkar wow bood ya iwa da hukum.
Neiliang u James Sangma da kyntait u leh yei mih pyrtuid wa yajan u wa uwa chah kem ha Assam deiwa ong wa kattu daw mih boon ki pynbaad ya ka sorkar MDA neibhah wa da jan ka Election.
Da ong u wa du wow pynbaad khlem i sabut toh iwa eh wei i pynbaad toh iwa suk.
Neiliang ka heh Congress kamjooh ka Montri sorkar warim, ka Deborah Marak da dawa ko wow pynman takit daka CBI ya i khayi tooh ya u mooyong deiwa ong wa em ki truck lai na Dainduba wa Gasupara.
Da ong ko leh wa ym du ka Jai Maa Enterprise wa kit ya u mooyong tangwa boon leh ki bru paidbah wa emkti wow khrong poisa na ki truck.
Da dawa ko leh na u Conrad wow phah pynhiar chuki ya u James lada chem toh wa emkti u ha ini i kaam.
Da ong ko wa kat wym pu leh daka takit wa laitlooid du heitæ u ye u tip yei sakhiat wa jia hapoh kani ka sorkar neibhah man ka por da klam yei baam tooh tangwa ym em kawon kawon ka takit.
Puræ leh: Ujor uwi cha ka CS wow dawa pyndam yei e bor yaka Jai Maa Coal wow chalan mooyong cha Bangladesh
