I jied ya u/ka President wa 15 ka ri India da man ko kawa lai bait ynne ha jylla Meghalaya, heiwa da sakhi yei wan ryntih kiwa mihkhmat kiwa kynthup ya ki MLA wa u MP ka Rajya Sabha wow chimbynta ha kani ka Election ya kawa da pynman ha Annexe Hall yong ka Yung Dorbar Chna Aiñ ha Rilbong, Shillong.
Ha ini i jied President thymme, ki 3 ngut ki MLA ym em u poi ki wei kini kynthup ki ya ki 2 ngut ki MLA ka NPP, u Sniawbhalang Dhar uwa em hapyrdi i kjut chitom wa u James PK Sangma uwa em cha baar Jylla, katwa u Marthon J Sangma uwa man u MLA ka AITC ym em u poi u neidaw wa chah ktah u ha u COVID-19.
Heiyatoh won wa kani ka Election, hawa yaklam wa kiwa mihkhmat kiwa da wan thap vote da sñiawthooh che wa ka kyrtong ka sorkar National Democratic Alliance (NDA), ka Droupadi Murmu da em kyrmen bha ko wow yoh boon ki vote na Meghalaya, neibhah kiwa boon kiwa mihkhmat da sñiaw ki wa emkaam wow elaad da ka manbei na ka jaitbru ri-loom wow chim ya ka chuki President.
Neiliang u Montri Rangbah ka jylla, u Conrad K Sangma leh da ong u wa lada ka kyrtong yong ka NDA kawa man na ka jaitbru ri-loom jop ko ya kani ka Election, daw wanrah ko yei kylla ha kiwa boon ki bynta kiwa yatoh wa ki ri-loom. Da ong u wa ymtoh wow wanrah yei kylla hajrong i pynbaad wa em i chah lehbeiñ ki ri-loom, tangwa heiyatoh wa kiwa boon ki bynta khamtam ha i roi i paar.
