I pynkreh ya u sarok 4-Lane kawa man da ka yingkieñ na Dhubri-Phulbari kawa lai najrong ka wah Brahmaputra da lai ko kamwa thmu wei yeini da pyntip da u Montri ka sorkar jylla uwa man u MLA ka Phulbari, u Abu Taher Mondal.
U Montri da ong u wa neiliang ka Meghalaya da em i pynslem kajiak wow sdang bar ya ka Assam, neibhah ka Assam dadep ko wow pynyieñ ya kamwa 34 tylli ki paya hadooh kattæ.
Da khana wa da lai u cha ka thaw kreh ya ka yingkieñ ha Meghalaya heiwa da pyntip cha oo da ki sahep wa daw ye u pyndep yei kreh heipor wa da booh lada ym em iwon iwon i jia.
Hawa kdaw wa kani ka yingkieñ daw wanrah ko yei kylla ha ka thaaiñ chaneiñ mihsngi, u Mondal da ong u wa u Montri Rangbah leh da chimkhia bha u ya ini i kaam nadooh wa sdang.
“Manda dep ya kani ka yingkieñ daw yoo phi ya chiboon ki kari wow lai cha Guwahati neibhah kani ka yingkieñ daw pynjan ko ya ka luti”, da ong u Mondal.
Hawa kylli, da khana u wa i jrong yong ka yingkieñ toh 19.3 Km, wei pynsñiaw u leh wa ye ko wow man kawi na ki yingkieñ wa jrong tam kawa lai najrong yong ka wah, neibhah daw em ko hadooh 199 tylli ki paya wow kyrchaan ya ka.
Da ong u wa lyngba kani ka yingkieñ daw pyntbian ya ka luti na Phulbari cha Dhubri hadooh 200 Km.
Katkam wa khana u Mondal, ka thong toh wow pyndep ya katai ka yingkieñ ha u snem 2028.
Discussion about this post