Khliehriat: Ynne ka sngi da pynman ya ka Review Meeting, ha East Jaiñtia Hills District heiwa u lat ka jylla, u Ganga Prasad da man u kam u chongknor ya ka yalang wa pynman ha Circuit House, Khliehriat. Ya u Lat da synraan da u Deputy Commissioner ka East Jaiñtia Hills District, u F.M. Dopth. Ha kani ka yalang da emlang ki heh yong ki tnat waphær waphær ka sorkar wa em hapoh ka District.
Ha kani ka yalang da pynyoo leh ya ka Power Point Presentation da kawi pa kawi ka tnat heiwa u Lat da sñiawkmen yeiwa da pynyoo kini ki tnat ha kani ka yalang deiwa ong wa toh i kwah samen yong oo wow wan cha East Jaiñtia Hills wow booddien ya ki kaam wa kreh ki tnat sorkar hapoh ka District.
Da kyntu u ya ki sahep wow kreh chitom ki khnang wa ki kaam wa leh ki yow yoh myntoi ka District waroh kawi deiwa ong leh wa i kaam yong ki daw yarap ki wow pynkylla yei rukom im ki bru waroh.
Chooh chooh da pyntip u wa ka Lakadong Mission kawa da sdang ini wa dep da booh thong wow pynlut T. 75 klur toh wow kyntu kynrong ya ka khayi pateiñ hapoh ka jylla waroh kawi.
Heijooh i por da ong u wa lyngba ka Ministry of Agriculture Govt. of India, daw sdang noh ya ka Milk Mission hei lut wa kynjoh T. 218 Klur wow pynchlur ya ki paidbah wow psan masi ki wei wow pynmih ya i dud iwa miat tam. Da kyntu u leh ya ki bru wow sdang noh ki ya ka kaam rep, ki kaam uiñke suwari, ki kaam thaaiñ tiar wa kiwi kiwi.
Da pyntip u leh wa 20 hadooh 25 tylli ki manyung ha ki 1800 tylli ki chnong ka jylla daw yoh bordiñ ki kam ki Solar Lights.
Chwa ini neiliang u F.M. Dopth da e u ya ki kyntien pdiang burom, heiwa hawa kut ka yalang da e u ya ki kyntien e khublei deiwa e khublei kyrpang ya u lat wa da chimkhia u wow booddien wei wow e mynsien ya ki sahep yong ki tnat sorkar waphær waphær hapoh ka District.
Discussion about this post