New Delhi: U montri ka sorkar pyrdi wa pait ya ka chnat Consumer Affairs, u Ram Vilas Paswan chirup wa u montri rangbah ka jylla, u Conrad K. Sangma ynne da wai ki ya ka Meghalaya Pavilion ha ka yaaw wa le sngi wa tip kam ka SIAL India 2019 ha nongbah New Delhi.
Ka SIAL India toh kawa pynman da ka SIAL Paris, kawa man ka yaaw wa heh tam wow pynyoo ya ki sap song baam wa ki jait baam waphær waphær.
Ka Meghalaya kawa man ka Partnered State la ar sien kattu yong ka SIAL India da pynyoo rong ko ya ki mar rep, ki syntu, ki soh wa pynmih da ka jylla.
I umngap wa tip kam i “Bee Natural” na COLK Pvt Ltd, Shillong yong u Vijay Byrsat da jop ko ya ka Golden SIAL India Food Innovation Award iwa da booh ya ka Meghalaya hapyrdi yong kani ka yaaw pynyoo rong ha Delhi.
U Conrad da neh u ha kani ka Pavilion waroh chi sngi heiwa da pynlut por u wa kiwa chimbynta, da yaklam u leh wa kiwa thied wa kiwa pathai khubor heiwa da pynche u ya ki heiyatoh wa ka Meghalaya wa ka thaaiñ mihsngi wow man ki kam ki ‘Food Destination’.
Da pyntip u wa ka Northeast Food Show, ka wow man ha Shillong ha u Kmaichonglad daw pynwandur ya ka kam ka SIAL Paris kawa wan pait u ynnin u snem.
Da pyntip u leh wa ka thaaiñ mihsngi ye ko wow man kam kawi na ki thaw wow ye u wan sdang u seiñ khih. Da pyntip u leh wa 7.8 percent na i thaw ka ri em i ha ka thaaiñ tangwa i boon bru man i du 3.8 klur iwa man kamwa 3.73 percent na i boon bru ka ri.
Ha kani ka kynti kamwa 30 ngut kiwa pynmih mar wa kiwa seiñ khih na ka jylla da chimbynta ki ha kani ka SIAL India heiwa da wanrah ya ki mar kam ki Coffee, chyrmit, slacha, umngap, sachram wa kiwi kiwi.
Discussion about this post