Shillong: Ynne i janmiet neiliang u montri ka chnat pohyung da khut yaklam u ya kiwa kitkaam ka CoMSO uwa da pynsñiaw wa neiliang ka sorkar da mynjur ki wow pynkrehkaam noh ya ki kyndon ka Inner Line Permit (ILP) deiwa pynkylla ya ka MRSSA wei da kyntu wow man kiwa yaichah hadooh u Naichiphaw deiwa kyrpaad leh ya ka CoMSO wow pynsangeh yei yakhih neibhah ka sorkar da pdiang ko yei dawa yong ka CoMSO.
Da em leh i phah kyntien leh neiliang u montri rangbah uwa da ong wa ka sorkar em ko i jooh i thmu wei da pdiang yei yumut ka CoMSO heiyatoh wow thap ya ki kyndon ka ILP ha ka MRSSA.
Neiliang ka CoMSO da paan ko dei thoh hajrong ini, tangwa neidaw wa u montri rangbah ym em u hapoh jylla wei da kular u wow yachem biang wa ka CoMSO hadien wa uiñ biang u cha jylla.
Kam ka dak wow kreh lang wa ka sorkar wei wow elaad ya ka sorkar wow pyndep ko yeiwa da kular neiliang ka CoMSO da rai ko wow pynsageh chipor yei yakhih kawa da pynbna da ka Stay Off the Road Peaceful Protest kawa da booh wow man mynstep.
Ka CoMSO da klam che ko leh wa lada ka sorkar ym pynkrehkaam ko ya ka ILP kamwa da kular ha u Naichiphaw, neiliang yong ka ym burom de ko ya ka sorkar wow pynman yakhih hadooh wa yoh ya ka ILP.
Discussion about this post