Jowai: Ynne ka sngi u MLA ka 2 Jowai, u Wailadmiki Shylla da lai pait u ya ka JNV Mukhla kawa da pynkylla wow man kam ka Institutional Quarantine namo ka thaw chongkset wa da pynkhreh da ki bor District ka West Jaiñtia Hills.
Katkam wa man ynne ka sngi da em 214 ngut kiwa kynthup ya ki 88 ngut ki chynrang wa 126 ngut ki kynthai ha ki 5 tylli ki Block ha kani ka thaw puræ wei kini boon toh kiwa wan na ka jylla Karnataka.
Katkam wa man ya kini ki 214 ngut daw booh ha kani ka thaw hadooh wa yoh ya ka Report COVID-19 yong ki ha kini ki sngi wow wan.
Hawa yaklam wa u Wailadmiki, da ong u wa hadien wa yoh ujor na ki manbei manpa heiyatoh wa ym biang i por e baam ya kiwa em ha kani ka thaw wei da chem u toh wa em i sñiawthooh bakla heiyatoh wa i por.
Da pyntip u leh wa hadien wa yaklam u wa kiwa toh u pynbiang baam ha kani ka thaw wei da rai wa i por wow e Breakfast toh 8:30 AM hadooh 9:30 AM, Lunch 12:30 PM hadooh 01:30 AM katwa Dinner won 7:00 PM hadooh 8:00 PM.
U Wailamiki da kyntu u leh ya ki manbei manpa yong kiwa chong kset ha kani ka thaw wow man ki kiwa yaichah wei wow krehlang wa ka sorkar kam ha kini ki por.
Discussion about this post