Kat dang lai ki sngi ki por i khynnia nei boon kari ha chnong Jowai nang joor i wei ini da pynthut ko chiboon ya ki khynnah skur wa ya ki bru paidbah waroh neibhah kamwa man kattæ da boonsien da hap maad yei sahkut kari bait ha Jowai.
Kamtæ neiliang ka JSU Jowai Circle da ong ko wa ha kini ki snem wa dadep da yooluti wa ym dam de ka sorkar lyngba ka chnat PWD wow chna noh ya uni u sarok Jowai Bypass warim wa lai lyngba ka Salini Colony chadooh cha yingkieñ Myntdu tangwa kamwa man kattæ i yooluti yong ki paidbah kut ko du ha chiteiñ donhi wot hawa da sdang wow chna ya uni u surok ini wa dep wei da yoo lakam wa da kreh ya oo chwa wow pynman ya ka dorbar mang tangka donhi kamjooh wow e jubab hi-eh hapoh ka yung dorbar chna aiñ ka jylla.
U President ka Jowai Circle, u Borntifulson Rupon, da ong u wa katkam ka khubor wa da yoh na ka chnat PWD wa da em ka mang poisa neibynta uni u sarok, tangwa da phylla wa hadooh ynne ka sngi ym em de u pynkreh ya uni u sarok. “Kattu won dapoi sa ka lyiur wei u slap leh da hiar u, heiwon de u yooluti ki paidbah wow dep noh ya uni u sarok?”
Da ong u leh wa i chna ya uni u sarok toh kawa daw yarap bha wow pynlait yei sahkut kari ha ka chnong Jowai, wei na itæ i daw ka seiñ da lai pait ko wei da chem yei sih wei haap wei oor uni u sarok. Kamtæ da kyntu ya ka sorkar, ka chnat PWD wei khamtam ya u MLA ka Jowai wow chna noh ya uni u sarok khnang yow pynsuk ya ki paidbah ka thaaiñ.
Discussion about this post