U slap wa joor uwa da sdang nadooh ynnin i miet ka 29 tarik da neh u hadooh ynne waroh chisngi chirup wa ka la’ær iwa da wanrah yei thut hei khih i kreh, i lai i wan kamjooh kiwi ki kaam ki bru kamjooh ki khynnah.
Ynne i step neiliang ki bor District ka East wa West Jaiñtia Hills da pynmih ki ya ka hukum wow phah khang ya ki skur wa ki thaw puræ wei da e bor leh ya ki wow chim ya iwon iwon i rai wa yoobiang ki katkam wa yah i man i long i bneiñ.
Ha Jowai da yoh u sakhi wa ka Wah Myntdu da kmai bha ko heiwa nadooh i step hadooh i sngi da yoo ya kiwa boon ki bru wa hiar charood yong ka wow khwe wei wow tong ya ki doh-um.
Waroh ki skur da man ki kiwa da khang wei ki dukan dukdoh kiwa boon kiwa em harood sarok kam ha Iawmusiang, ha Iawthymme wa kiwi da man kiwa da khang neidaw wa joor ware u slap.
Ynne nadooh i step kamwa 9:00 waje da hap leh wow pyndooh ya ka bordiñ neidaw wa boon ki nat dieñ kiwa kheiñ kiwa haap hajrong ki sainar bordiñ wei khnang wow wanrah yei chngaaiñ da pyndooh noh ya ka bordiñ.
Ki sarok wa jooh joor i sahkut kari leh da duna kari bha ki pyn nei sngi kam ha Iawmusiang, Newhill, Ladthadlaboh wa kiwi.
Ki luti syngkieñ leh ha kiwa boon ki bynta da sakhi wa kheiñ wa pat ki dieñ heiwa ki bor ka DDMA wa kiwi ki chnat da yaleh ki wow pynkhooid ya ki sarok.
Hadooh wa pynmih ya kani ka khubor ym em iwon iwon i jia wa sñiawsih ha kiwon kiwon ki bynta.
Hajrong ini neiliang ki bor sorkar da kyntu ki ya waroh wow man kiwa syndong wei wow husiar neibhah wa u slap wa ka la’ær daw pteiñ chooh u sa myntu i miet.
Discussion about this post