Ka Ches’ Star Higher Secondary School Jowai ha ka 17 tarik uni u bnai da leh burom kyrpang ko ya ki 31 ngut ki khynnah skur yong ka kiwa da Pass ha ka Result SSLC wa HSSLC ka MBOSE yong uni u snem 2025.
Kini ki 31 ngut kynthup ki ya 25 ngut kiwa Pass ya ka SSLC wa 6 ngut won kiwa Pass ya ka HSSLC Exam.
Ya ka yalang pynkup burom da pynman ha Auditorium ka District Library, Jowai hei emlang ki bei ki pa yong ki khynnah skur, kiwa sikai wa kiwi, katwa ka E.O. Laloo kawa da chong ngiah kam ka Principal ka Govt. Boys’ HS School, Jowai kamjooh kam ka In-charge SDSEO Amlarem wa kiwi ki kyrdan, da wan sakhi ko kam ka kongsan.
Hawa klam kam ka kongsan da yaroh wei pynchlur ko ya ki khynnah skur kamjooh kiwa sikai u nangleh bha chooh chooh ki chaphrang yow ku ka skur neipor cheipor.
Wei ya ki khynnah wa da Pass na kani ka skur leh kyntu ko wow nangleh bha chooh ki hei puræ puthi wa chakhmat, neibhah kiwa ye u lehbha ha ka Result kitæ hi wa jooh rap tyrchaaiñ bha leh ha ka mynried.
Heiyatoh ya kiwa rap duna won hei puræ puthi ong ko, “Lada maad yei chah rem hei puræ puthi, ymtoh u dooh kyrmen neibhah dang em ka laad wow yakhun biang, heijooh i por leh em chiboon ki Professional Course wa ye u wai laad wai luti katkam i ye namo i sap wa da e kyrpang u Blai ya uwi pa uwi”.
Da kyntu ko leh wow sñiawthooh bha yei sap dep tæ lai pynpliah katkam i sap wa em.
Hawa yaroh yei kreh chitom kiwa sikai kyntu ko wa kam kiwa sikai hawa kreh yei kaam toh u e i maya salonsar ya waroh ki khynnah ym wow maya du ya kiwa stat donhi.
Ha kani ka sngi da yoh leh i klam na ka Principal yong ka skur ka Idawandafa Jones Shullai, i klam na uwa sikai Higher Secondary School, u R. Shullai, i klam na u President ka skur u S.B. Laloo, neitæ na ki khynnah Topper ka skur yong SSLC wa HSSLC.
Da pynchongchit chooh chooh ya kani ka sngi dei chaad i rwai ki khynnah skur.
Discussion about this post