Kamwa da tiplang wa ka 8 tarik u Naikhynde toh ka World Literacy Day næ ka sngi kyrpang i puræ puthi wa da pynbna da ka UNESCO nadooh u snem 1966, kamtæ ha ka thong yong kani ka sngi, ka RC Eve Secondary School Mihmyntdu kam kawi na ki chlem e sikai ya kiwa boon ki khynnah wa wan na ki manyung wa duna i yoh i la, ha ka 10 tarik u Naikhynde da chimkhia ko wow pynman ka yalang wa kyrpang wow klam u khana hapyrdi ki khynnah chaphang i kordor wei emkaam yong i tip i stat wei purae puthi ha kani ka juk wa katni.
Ha ka yalang yong kani ka sngi wa da pynlai da ka Jessica Biam, Headteacher RC Eve Secondary School, Mihmyntdu da wan wow emlang leh da ka D. Lathong, BMC-SSA Laskein kam ka kongsan najrong ki dkhot ka School Managing Committee wa kynthup yow Rev. Fr. H. Lamare, Secretary SMC, u Fedrick Synnah, SMC Member, ka Sr. Pushpa Beck, Headmaster, ka Sr. Shella, Principal Don Bosco School, Mihmyntdu kiwa sikai wa kiwi kiwa chah khut sñiawbha.
Kam wow kdar luti ya ki bynta wa chakhmat, u Rev. Fr. H. Lamare da siang da booh u ki kyntien duwai blai kamjooh wow e ki kyntien kyrsu kyntu ya ki khynnah neitæ pynbood i klam i khana chaphang i kordor yong i tip i stat wei puræ puthi da u Fedrick Synnah, i klam hajrong ka phang pyrdi wa ong ‘Promoting Multilingual Education-Literacy for Mutual Understanding & Peace’, da pynsñiaw da ka Baiahunlang Phawa, Asst. Teacher RC Eve. Secondary School Mihmyntdu.
Iwa kyrpang chooh chooh ha kani ka sngi neiliang ka Manchaki Laloo, Teacher In-charge OOSC Special Training Centre RC Eve. Mihmyntdu da khana ko chaphang i krehkaam ka Centre nadooh u snem 2013 hai pait i pynlai ka (L) Tina Lakiang.
Kamwa jooh man na ki snem cha ki snem ha uni u snem leh dei kreh chitom ki Volunteer kani ka Special Training Centre napyrdi ki 70 ngut ki OOSC da ye ko u Mainstream kamwa 12 ngut ki khynnah ki wow psiah cha ki Normal School.
Ka D.Lathong hei e kyntien kam ka kongsan da ong ko man iwa sñiawsuk wow yoh ko u embyntalang ha kam kani ka yalang wa emlang chirup wa ki khynnah skur wei dap ko leh dei sñiawburom ya kiwa pynlai yong ka RC Eve Secondary School, Mihmyntdu.
Ki kyntien chon pyrkhat ka D. Lathong ya ki khynnah skur toh kiwa ong ko, kynmoo wa i im ha kani ka juk wa katni khlem i tip i stat, i purae puthi ym ye u poi cheiwon cheiwon neibhah i stad i tip, i purae puthi man ki kam ka wait wa ye u thwat luti yei sahdien wei sahdoom sahbiej na nga na phi, neitæ i daw ka UNESCO kamjooh ka sorkar India ha ka thong yong ka World Literacy Day yaleh ko u pynmih u chna chiboon ki laad ki luti hei wow kyntu kynrong yei stat i tip wei puræ puthi iwa man salonsar ya waroh ym du kat ya ki khynnah wot ya kitu kiwa da heh leh pynchlur ko ha kini ki sngi lyngba ka ULLAS.
Najrong i klam i kappæ chooh chooh da pynchiap leh ha kani ka yalang da ki chaad, ki rwai, i puræ poitri wei yakob dro dur iwa da ya chimbynta chongchit da ki khynnah skur.
Discussion about this post