Ka Women’s Welfare Committee yong ka Loomkyrwiang Dorbar Chnong kam chibynta i leh burom ya ka Mother’s Day, ha ka 10 tarik uni u bnai da pynman ko ya ka yachemlang wa kyrpang ha Yungwalieh heiwa najrong ki khon kynthai khyllood, ki manbei da wan sakhilang leh da u A. Andrew Shullai, MDC kam u kongsan hei emlang u Lammat Oo Laloo, Waheh Chnong Loomkyrwiang, u Chibor Najiar, Adviser ka chnong wa u Daioolang Pakma, Asst. Waheh Chnong.
Ha ka yalang wa yoo chongkun yong kani ka sngi, ka Samhakani Laloo, Secretary WWC Loomkyrwiang kam ka chongknor da e ko ki kyntien yahkhmat heiyatoh wa ka Mother’s Day neitæ da em i ngoohblai da ka Wandaka Laloo, i klam pdiang burom da ka Heiioomitre Pakma, kamjooh leh ya ki kyntien e mynsien heiyatoh wa ka Mother’s Day næ ka Sngi Kyrpang yong ka Bei, da e da ka Anikaru Laloo wa ka Dengsuk Laloo.
U Lammat Oo Laloo hawa klam ha kani ka yalang da yaroh u ya ka Women’s Welfare Committee yong ka dorbar chnong kawa da chimkhia u pynman ya kani ka yalang neibynta i burom ki manbei wa em hapoh ka dong ka chnong, kyrsu kyntu u leh ya ka Women’s Welfare Committee wow yaleh ko u pynjanai chooh yei rukom krehkaam yong ka ha ka thong yong i miat i bha hapoh ka imlang sahlang na ki por cha ki por.
U A. Andrew Shullai, hawa e kyntien kam u kongsan dap u dei sñiawngooh sñiawburom wa khroo ya ka Women’s Welfare Committee kawa da kitkhia u pynman ya kani ka yachemlang wa kyrpang hei wow pynkhroo yei burom wei pyrtuid i naam ka Bei næ ka Tre Wakha. Ym ye u len ka Bei toh sakhiat ka bru kawa em ka yukit wa khia neibynta ki khon wei man ko leh ka bru kawa pyndep hok yei kaamram yong ka hei wow pynkdang pynkot yow kyllep u sdep, u biang u toh u tne ki khon wei wow yah u tyoor luti yow man ki khon kiwa emburom em akor wei yoh ya ka mynried wa suk wamiat wabha wei khaddooh da pynkut u yei klam deiwa e khublei kitbok kitrwiang ya waroh ki manbei ha kam kani ka sngi wa khroo wa kyrpang yong ki.
Chooh chooh ka Women’s Welfare Committee, Loomkyrwiang kam ka dak wow pynkhroo chooh ya ki manbei kiwa da kynjoh 60 snem i rta, kiwa da yakit yabah ya ki kaam yonglang yongbi hapoh ka chnong ka thaw na ki por cha ki por ha kam kani ka sngi da e burom ko leh ya ki leh da ka muhor sahnaam næ Appreciation Award heiwa yeini i bynta da pyndep da u A. Andrew Shullai, u Lammat-Oo Laloo, u Chibor Najiar wa u Daioolang Pakma.
Discussion about this post