U Symbood Montri Rangbah ka jylla, u Prestone Tynsong da ong u wa ka Sur ka Bri U Hynñiewtrep ye ko wow leh katwa ngait yow leh warom yei dap chi snem i khlaad u Cherish, tangwa ym toh u ktah yei suk i saaiñ.
Ka Sur ka Bri u Hynniewtrep da pynbna ko wow pynman ya kiwa boon ki yalang nadooh ka 12 tarik wei kamjooh ha ka 13 tarik uni u bnai yow leh warom yei dap chi snem i khlaad uwa yahkhmat warim ka HNLC, u Cherish Starfield Thangkhiew, wei kamjooh yow kyntu wow wah ya ki lama yong kam i dak wow pynyoo yei pyrchah yei wym pu ye u pynlait paidbah ka sorkar ya ka bui takit hajrong i chah siat yap.
Hawa kylli, u Prestone da ong u wa da dep klam che cha ki dkhot ka Sur ka Bri U Hynñiewtrep wa ye ki wow leh katwa mon, tangwa ym toh u ktah yei suk i saaiñ. Hawa yatoh i wym kwah u em pulit ha ki sngi wa pynman yei leh warom, u Symbood Montri Rangbah da ong u wa ka sorkar ka burom ko ya itæ i sñiaw yong ki, tangwa heijooh i por da kyntu wa toh u pyntikna wa ym pynmih yei kulmar wei wow chim ya ka aiñ ha ka kti yong ki.
Ha iwi won i liang, u Prestone da ong u wa ka sorkar u pyntikna ko wow rah ya ka bui takit hajrong i jia ya u Cherish ha ka sngi sdang ya ka dorbar wei ya katni ym emkaam wow pynman ya ka ka dorbar wa kyrpang hajrong kani ka phang.
