Shillong: Ka dhab ki montri yong ka sorkar jylla ynne ka sngi da mynjur ki yaka Ordinance hajrong wow pynkylla ya ka Meghalaya Residents Safety and Security Act (MRSSA), 2016, wei kani ka Ordinance u krehkaam ko chisyndon wei daw pynskem noh ha ka yung dorbar ka wa daw pynman yow man ko kam ka aiñ wa pura.
Hawa klam wa ki laad pathai khubor hadien ka yalang, u symbood montri rangbah, u Prestone Tynsong da ong u da ini i pynkrehkaam ya ka Ordinace, waroh ki bru ki wym toh ki tre chnong yong ka jylla Meghalaya daw hap ki wow Register næ pyntipmit yaki hawa wan ki cha kani ka jylla.
Da ong leh wa ka sorkar daw pynkylla ko leh ya ki Rule yong u snem 2017 kawa yatoh wa ka MRSSA, 2016 yow khlan ko wow piat ya ki bru wa wan cha kani ka jylla.
Da ong u wa ha u snem 2016 hawa da wanrah ya kani ka aiñ, i thmu yong kani ka aiñ MRSSA man bait ko du ya kiwa wan chong yung wai wei da phah ya ki tre yung wow phah pynbiang ya ki kot ki sla yong kitu kiwa wan sah ha ki yung yong wei wow pyntip cha ki bor pynlai yaka chnong, wei da pynrap u kattu kani ka aiñ ym toh de du ya kiwa chong wai wei kamjooh leh ya kitu ki bru kiwa wan cha kani ka jylla wa ki toh u pynbiang ya ki kot ki sla wa emkaam.
Ha kawi ka liang, u Tynsong da ong wa ka sorkar ka klam che ko wa kani ka aiñ ym ktah ko ya ki baar jylla kiwa man kiwa chong chnong wa pura yong ka jylla Meghalaya wa ya kitu ki wakreh sorkar kiwa man ki wakreh ka sorkar pyrdi næ ki wakreh waka sorkar jylla kiwa da tipmit da ka sorkar.
Da ong u wa kani ka aiñ u krehkaam ko du ya kitu ki bru wa wan cha kani ka jylla kam kiwa mylla sngi, khayi pateiñ, kiwa wan ke sñiawbha; waroh hap ki wow pynche ha i por wa wan ki wow psiah wei daw em ka kyndon wow pynchitom katkam ka Indian Penal Code (IPC), 1860 hapoh ka kyndon 176/177 lada thok ki næ ym ye ki wow pynsakhiat.
Da ong u wa ki bru kiwa kwah wow wan cha Meghalaya, hap ki wow Register Online ka wow pait ya ini da ka District Task Force Committee kawa khlieh da ki Deputy Commissioner wa ki Superintendent of Police.
Discussion about this post