U Montri wa pait ya ka chnat Bordiñ ha ka jylla, u James PK Sangma da pyntip u hapoh ka Yung Dorbar wa lyngba ka One Time Settlement (OTS) Scheme, ka Meghalaya Energy Corporation Ltd. (MeECL) hadooh katni da yoh pdiang ko ya ka poisa wa sah na kiwa pynemkaam bordiñ waroh man ko T. 19,02,47,452 na ka T. 554.72 klur kawa toh wow yoh.
Yeini da jubab u James yeiwa kylli u MLA ka Congress na Umroi, u George B Lyngdoh, heiwa neiliang u James da pyntip u wa ka MeECL lyngba ka OTS da e laad ko ya ki paidbah wow su ya ka bordiñ 30% na kawa sah wei neiliang ka chnat da pynyinsur ko ya kani ka Scheme hadooh 31 tarik uni u bnai.
U Montri da pyntip u wa i yoh pdiang ya ka poisa wa sah da ka MeECL boon dooh toh na West Jaiñtia Hills wa kynjoh cha ka T. 9,47,27,905 wei bood won sa ka Ri-Bhoi wa da yoh T. 7,25,45,196, katwa em won ki District kiwa yoh du kattu katni lak, wei ka district wa duna dooh toh na South Garo Hills T. 7,28,303 katwa na East Jaiñtia Hills da yoh T. 64,35,576.
Katkam wa ong u James wa i daw wa duna wa yoh poisa na kiwi ki District toh wa duna i pynsñiawthooh chaphang ka OTS, heiwa da pynttip u wa ka MeECL daw hap ah noh ko ya ka bordiñ yong ki manyung ki wym ye wow su ya ka Bill ha i por wa da booh.
Da pyntip u leh wa kiwa chong chnong kiwa da chim kabu wow su ya ka bordiñ lyngba ka OTS hadooh katni em ki 3152 tylli.
Chooh chooh heiyatoh wa ini, neiliang u MLA ka NPP na Jowai, u Wailadmiki Shylla da ong u wa hawa pait kamni i rukom su toh iwa boon dooh na West Jaiñtia Hills tangwa manda em ka Load Shedding, ka Jaiñtia Hills toh kawa chah pyndooh bordiñ boon kynta dooh, kamtæ da kyntu u ya ka chnat wa neini chaphrang lada em biang ka Load Shedding wow pynduna ya ki kynta wa pyndooh ya i bordiñ.
