Shillong: Ka Congress ynne da ong ko wa daw pynmih pyrthai ko ya ka sorkar wa yahkhmat da ka NPP ka Meghalaya Democratic Alliance (MDA) kawa lute ya ka jylla deiwa ong wa ym em ki wow u lai laitlaan. Ya kani ka rai da chim ha ka yalang ka CLP kawa da ong wa daw klam ko hajrong i tih mooyong tooh wa i challan tooh ya u mooyong hapoh jylla.
Ka Congress da ong ko wa i pynslem ya i kit ya u mooyong toh wa em i thmu ka sorkar wow elaad yei tih mooyong iwa ktah leh ya ka jylla waroh kawi.
U heh ka Congress, u Dr. Mukul Sangma da ong u wa em i thut hei pynlai ya ki mar pohkhyndaw hapoh jylla iwa da ktah joor ya ka yarong poisa ka jylla.
Neiliang u Mukul da ong u wa ka dan (Revenue) wa toh u poi cha ka sorkar da chah lute noh ko neibhah da jooh sñiaw u wa parom ki bru yei kit tooh ya u mooyong wei da kylli u leh ya ki lok u ha ka sorkar wa neiyi i daw leh ki yeini.
Da pynbaad u leh wa ka sorkar leh ko yei kaam iwa pynkylla ko ya i rukom krehkaam ki chnat sorkar iwa man iwa maa bha. Da ong u leh wa ini i rukom krehkaam daw ktah joor ko ya ka sorkar ka wow kreh du da ki kaam baam-tooh.
U Mukul da kdaw u leh ya ki kattu katni i jia wa kylla ki truck wa kit mooyong iwa pynyoo wa em iyi iyi ha lyndet ini waroh.
Da ong u leh wa lada em ki sahep kiwa leh pyrchah, ki leh chah kyrriah kaam wot ki wei i kit tooh ya u mooyong daw ktah bha i ya ka jylla.
Da ong u wa ka National Green Tribunal (NGT) da pyrchah ko ya i kit ya u mooyong tangwa na ki mukotduma kiwa tih mooyong ha Supreme Court da booh por ko wow kit ya u mooyong wa dang sah.
Chooh chooh da ong u wa ka Supreme Court da pynlait ko ya u mooyong wa da dep thaw tangwa katkam wa man katni ya u mooyong wa da kit toh uwa ympu em dep thaw.
Da kylli u leh ya i kaam wa da leh ka sorkar hajrong ini waroh. Da pynkut u deiwa ong wa ka sorkar da tympiah ko ya ka jylla.
Discussion about this post