Ka Meghalaya Editors’ and Publishers’ Association (MEPA) kawa man ka seiñ wa ha khlieh dooh yong ki laad pathai khubor ha Meghalaya da yoh pdiang ko ya ki ujor na kiwa pathai khubor ha ki District waphær waphær yong ka jylla yei em ki YouTuber kiwa man kam ki bru samen kiwa lai lum khubor kylleiñ kylleiñ, kiwa lai leh cha ki yalang waphær waphær yong ka sorkar, wei da em leh kiwa emlang ha ki Press Conference, Press Briefing ha ki District. Najrong itæ da em leh ki ujor wa kini ki YouTuber da biah ki leh ya i kyntien ‘Press’ ha ki kari yong ki.
Ka MEPA ha ka yalang kawa da pynman ha Shillong ynne ka sngi, da rai wow pynche cha waroh ki paidbah wa ki laad pathai khubor wa da e bor wow kreh toh wow Register ki ha ka yung krehkaam ka Registrar of Newspapers of India (RNI) wei wow lai pyntipmit (Empanelled) waka Directorate of Information and Public Relations (DIPR) yong ka sorkar Meghalaya.
Najrong ini, kiwa pathai khubor næ kiwa lum khubor hap ki wow em ya ka Identity Card wa da e da ka kotkhubor, TV Channel næ Digital Channel wa ki kreh ki næ wow pynyoo ya ka Accreditation Card wa da e da ka DIPR.
Kamtæ khnang wow lait na iwon iwon i chim kabu da ki bru samen wei wow kiar nei kulmar, ka MEPA daw thoh ko cha ka DIPR hajrong ini i kaam khnang wa ki paidbah u che ki yow lait nei chah yah bakla ha ki bru kiwa kam hi-eh kam kiwa thoh khubor.
Heijooh i por, neiliang ka MEPA ha ka yalang wa ynne hi da rai wow ya embynta lang wa ki seiñ yong ki laad pathai khubor waphær waphær ha ri India yow thoh cha u Chief Justice of India yow kyntu ya oo wow tuklar lang hajrong i pyrchang wow yooh yei hok yong kiwa thoh khubor (Press Freedom) kamwa da jia ha ki kajiak sngi wa da dep ya ki kattu katni kiwa thoh khubor ha Delhi.
Discussion about this post