Ka Fishing Association yong ka Mukhla Dorbar Pyllun dap ko dei sñiawsih wei sñiawkhia hawa yoo wa ki bru wa sih da wieh dawai wieh bih ki ha ki wah kiwa haap hapoh i pait yong ka chnong ka thaw wa ka Association hi kamjooh.
Ini da jia i neipor cheipor man-u-snem, khamtam heipor tlang wa da khian ki um ki wah. Dang ha kani ka 30 tarik uni u bnai January da chem wa da em boon ki dakha wa da yap ha ka wah Bampyrthap, Mukhla nei wieh dawai wieh bih ki bru wa sih. Ini i leh ki bru pynwiar jait ko ya ki dohum dohwah, iwa da pynman ya ki doh um u yap nadooh ki khian hadooh ki heh.
Kamtæ ka Association da maham joor ko ya kini kiwa leh sih wa lada chem, u ujor u e kti ya ki cha ka aiñ wow pynchitom joor leh ya ki.
Kamjooh leh neiliang ka Association da booh ko i kyntu ya ki bru paidbah kiwa lai yaaw lai haat wa hap husiar bha ki, ham kmen u thied ya kiwa yoo phi ki dakha Pnar dakha Local na kiwa dai ha yaaw ha haat khlem da tip bha phi neiwon yoh ki, neibhah lada tne phi u thied ya ki dakha kiwa e bih ki bru, daw man ko i tim ya ka yung ka sem, ya ki khon ki kti ki yong phi wa daw man kamwa rah phi dei bih ha ki pliang ja pliang jhoor yong phi neibhah ka bih kawa e ki ha ki dakha man ko ka bih kawa ye u rah wot yei jait kjut kam ka Cancer, kjut Kidney kiwa saja bha u sumaar.
Kamtæ da kyrpad lang ya waroh u ya krehlang i wym toh du u pynneh i ya ki dohum dohwah, tangwa u pynneh i leh yei chait i khiah yong i wa ka jaitbru hi waroh kawi.
I pyntip na u Charles Sumer, General Secretary ka Mukhla Dorbar Pyllun Fishing Association, Mukhla.
Discussion about this post