Shillong: Ka sorkar jylla ynne ka sngi da mang ko T. 75 klur neibynta wow pynbha pynmiat ya i rukom krehkaam ki thaw sumaar ha kylleiñ ka jylla.
U Montri Rangbah ka jylla, u Conrad K Sangma da ong u wa ki thaw sumaar man ki kiwa emkaam bha wei neiliang ka sorkar da rai ko wow pynbiang ya iwa emkaam kini ki thaw nadooh ka bordiñ, ka um, wow pynmiat ya ki thaw sah ki wakreh, ki thaw thiah wa kiwi kiwi.
Chooh chooh da pyntip u wa ka sorkar da phah ko ya ka chnat i chait i khiah wow pynbiang ya waroh iwa emkaam wei ye wow sdang noh ya ki kreh hapoh 30 sngi, deiwa ong leh wa i pynbha pynmiat u sdang chwa i na ki PHC wa CHC ha ka bynta wa nyngkong ya iwa da booh thong wow pyndep chwa wow kut ka mang tyngka yong uni u snem, katwa ka bynta wa ar won toh neibynta ki Sub-Center wa ki Civil Hospital neibynta wow pynbiang chooh chooh ya ki ICU.
U Conrad da ong u leh wa ka sorkar da booh thong ko wow pynbiang chooh chooh ya ki wakreh ka chnat khnang wa i kreh yong ki Doctor ym khia ware i, yow ye ki wow pynlai yumut wow e sumaar ya ki paidbah.
