Ka Ri-Bhoi District da yoh ko yaka Takma Ksiar ha ki yalehbol ki U-18 ha waroh ar ki yalehke ki kynthai wa chynrang kiwa da pynman kam chibynta ka 5th Meghalaya Games ha P.A. Sangma Football Stadium, Tura.
Ha ka yalehke ki chynrang da man ko kawa yoosuk bha wei kawa sahkynmoo hapyrdi ka Ri-Bhoi waka West Jaiñtia Hills kiwa da sai wei da theh lut waroh i sap i bor yow yoh yei jop.
Ka yalehke hadooh wa kut ka kylla step wa kylla miet ym em wa yoh u thap kool wei manda poi cha ka Extra Time da kut ka kylla step khlem em biang wa yoh u thap tangwa haka kylla miet chwa wow kut, u Riskhem Syiem da pynjop u yaka Ri-Bhoi.
Ha ka yalehke yankieh wa le ki chynrang, ka East Khasi da jop ko yaka West Garo Hills da 3-1.
Uwa yalehke ka East Khasi, u Freddy Jyrwa uwa thap soo tylli ki kool ha kani ka lympung da yoh u yei naam Top Scorer. U Kitboklang Buam na West Jaiñtia Hills da yoh u yei naam Best Goalkeeper katwa u Tirot Kyndait uwa na West Jaiñtia hi da yoh u yei naam Best Player of the Tournament.
Ha ka yakhun Final ki kynthai won, ka Ri Bhoi da jop ko yaka East Khasi Hills da 3-2 deiwa yachut Tie-Breaker hadien wa kut ka yalehke da 0-0. Heini kawa yang kool ka Ri-Bhoi, ka Nibari Maring da ye ko wow khanglaad ya ar tylli ki bol wa chut kiwa yalehke ka East Khasi.
Ka Maring da yoh ko leh yei naam Hero of the Match kamjooh yei naam Best Goalkeeper of the Tournament. Deiwa thap won 15 tylli ki kool, kawa yalehke ka East Khasi Hills, ka Inrilaidor Khongthaw da yoh ko yei naam Top Scorer wa i naam Player of the Tournament.
Discussion about this post