Kiwa chong chnong ka Mynsngat ynne ka sngi hei yahkhmat u Phresmi Suting da lai ujor FIR ki pyrchah ya ka chnat Public Health Engineering (PHE)-RWS Division, Jowai wa ya ki Chairman/Secretary ka VWSC ka chnong Mynsngat deiwa pynbaad wa baam tooh ki ya ka Scheme Swachh Bharat Mission hapoh ka chnong.
Yeini da leh hadien wa yoh yei jubab ka RTI na ka yung krehkaam PHE-RWS Division Jowai wa em hadooh 164 tylli ki manyung wa yoh myntoi na ka Swachh Bharat Mission kiwa toh u yoh paikhana hei lut wa Rs.12,000 kawi tangwa da mih du i pyrtuid wei khlem da yoh ya ka poisa næ i pynkrehkaam kamwa da mang ka chnat PHE-RWS Division Jowai ha ka Work Order wa dadep pynlait nadooh ka 06-09-24 wei kiwa da mih pyrtuid kam kiwa yoh myntoi ym tip ki iyi iyi leh khlem da leh ya kani ka RTI yow chem yeini i baam tooh.
Ha ka FIR da dawa ya ki bor ka aiñ wow kem wei chitom deiwa khor ya kiwa emkti wow pynemkaam bakla ya ka poisa paidbah.
Da ong wa hapoh ka Swachh Bharat Mission, ka sorkar da booh thong ko wow e paikhana ha man ki thlu yung kiwa dooh wa duk yow pynwiar noh yei lai paikhana cha khloo tangwa da man noh ko iwa dap dei baam tooh yei hok yong kiwa dooh wa duk.
Kiwa chong chnong da ong ki leh wym chong kli kti ki wei daw booddien yow yoh yei hok paidbah waroh.
Ha kani ka FIR kiwa soi pyrtuid da em ki 36 ngut kawa da booh ha Nartiang Police Station.
Discussion about this post