Jowai: Ynne ka sngi da mih i awri awra hadooh wa poi u pood wow jrongkti wa i ya khyrrup haprdi kiwa kyrchaan ya u Waheh Chnong wa katni u Shanbor Suja wa kiwa pyrchah ya ka Dorbar wa thmu u pynman da u Waheh Chnong deilang wa u Doloi ka Elaka Rymbai ha ka chnong Ladrymbai Dongwah, East Jaiñtia Hillls District.
Ini da jia i ynne ka sngi hadien wa u Dolloi ka Elaka Rymbai u Elios Swer, da pynbna u wa daw em ka yalang dorbar ha kani ka chnong neibynta wow jied wa kitkaam (EC) thymme, tangwa ini i waroh ym em mankaam ko neidaw wa boon kiwa chong chnong wa kynthup ya u General Secretary chnong u Wansymper Biam, President VDP u Jop Latam, President Youth Wing Ladrymbai Dongwah u Marshal Biam wa ki dkhot chnong khynthai wa chynrang pyrchah ki.
I pyrchah yong ki toh hajrong ka yurim waka dorbar wa thmu u pynman da u Dolloi ka Elaka wa u Waheh Chnong toh kawa kiwa boon ym em tip ki wei ha ka miet wa pynbna ki ym em khana che ki ya i por.
Da ong leh wa wow jied ya ka EC emkaam i mynjur lang yong ki paidbah ym du yong u Dolloi, u Waheh Chnong wa ki dkhot ka Elaka, kamtæ kiwa pyrchah da ong ki wa i thmu wow pynman ya kani ka dorbar toh ka wym em yurim iyi iyi leh.
Neiliang u Waheh Chnong u Shanbor Suja hawa ym lait tala u pynman ya kani ka dorbar da e hukum u wow tympiah ya u tala ka yung dorbar neibhah wa ym tip ki yi wa khang tala ka tangwa ym em ye u leh ya ini.
Ha i yaklam wa pynman ha lait ka yung dorbar, neiliang yong u Waheh shnong da ong u wa i thmu wow jied ya ki dkhot krehkaam ka chnong man ko dei mynjur yong ki paidbah wa boon wa lang wei man ko leh katkam wa rai ki paidbah.
Kiwa kreh ka District Council won kiwa thmu u wan sakhi ya kani ka yalang da ong ki wa ki wan ki wow pyndep ya i kaam yong ki, wei da ong ki leh ya kiwa pyrchah wa emkaam u pynman ya ka yalang, tangwa neiliang u Secretary wa ki paidbah da pynsniawthooh ki wa lada kammon kammon leh ym e laad ki ya kam kani ka yalang khlem em chwa i sniawthooh yong lang.
U Marshal won da u ong wa katkam ka Establishment of Elaka and Village Election, Appointment, Power and Functions of Doloi/Sirdar and Waheh Shnong Act, 2015, wa i jied ya ki dkhot ka EC toh u jied da ki paidbah ym toh da ki kattu katni ngut.
Hadien wa mih i awri awra, u Dolloi da ong u wa haap pynsangeh chwa ya kani ka yalang wei yow pynman noh ka ha iwi i por.
Neiliang kiwa pyrchah da ong ki chwa wow pynman ya kani ka dorbar, neiliang u Dolloi wa u Waheh Chnong ym em pyntip næ e chithi ki cha u Secretary wa cha kiwa chong chnong wei da pynbna ki lyngba ki tanghæng khlem da pyntip ya i por wa tikna.
Da ong ki leh wa uni u Waheh Chnong wa katni da wan lehbor bait u kamni la 3 sien heiwa da yah lang u da ki pulit ka Battalion hapoh kani ka chnong wei ym e laad wow pynman ya kam kani ka dorbar.
Da ong ki leh wa toh u pynman chwa ya ka yalang wow pynche ya i krehkaam, i kheiñ ya ka poisa kawa da pynlut yong ka chnong wei manda hun ki paidbah ya ini u pynman ya i jied ya kiwa kitkaam thymme ka chnong.
Katwa neiliang kiwa kreh ka Council hadien wa yoo ki wa da mih i kulmar na yut noh ki na kani ka thaw thmu wow pynman ya ka yalang.
Discussion about this post