U MDC ka Jowai North, u Brightstar Chyrmang ynne ka sngi da pynbna paidbah u wa da mih noh u naka Party NPP wow kyrchaan pura ya u Awhai Andrew Shullai, u kyrtong ka TMC wow yakhun yaka Election MLA 2023 naka 2-Jowai Constituency, hei emlang ki paidbah wa kyrchaan yong oo.
Hawa klam wa kiwa pathai khubor, u Brightstar da khana u yei daw wa yut u naka NPP deiwa ong wa kam uwa mihkhmat wada jied ki paidbah cha ka JHADC chem u wa hapoh i yahkhmat ka sorkar NPP da tyngkhooh chiboon i eh i khor, wei wot ka District Council leh maad ko chiboon i eh i khor nadooh i dooh tulop kiwa kreh da ki bnai.
Da ong u wa katkam i lai luti, ka poisa em hi ko yow su tulop tangwa haap ko hei pait i pynlai ka sorkar jylla, wei boonsien hawa lai kyrpaad wow pynlait ki yaka bhah poisa yow yoh su tulop leh ym mano ka sorkar jylla wei kut i hei kular donhi.
Hawa beiñ u yei wym biang i synchaar ka sorkar NPP hapoh ka jylla, da kdaw u leh ya ki boon i rukom krehkaam wa tkoh haka District Council haki snem wa oo da lai luti u kam u MDC.
U Brightstar da ong u leh, “Wymtip de kammon jait kheiñ ka sorkar jylla ya i, wei boonsien hawa lai yachem ya u Montri Rangbah jooh ong u ya oo wow pait wa ka jylla kawa dooh bha ko ha ka yarong poisa wei ka District Concil leh i jooh hi iwa da wanrah yei dooh poisa. Jooh ong O sñiawbha sylli yaki kari wa lai tooh wa kit mooyong hantæ kut hei ky’i donhi khlem leh iyi iyi, wei da man pathan i chim kabu hi-eh da ki kattu katni donhi u pynlang yaka spah ka phaw wym lai katkam ka aiñ”.
Da ong u leh wa nachwa da yoo waka District Council wym em ware maad ko kam ini i jait chitom ha ka poisa kamwa man ha kini ki snem wa yahkhmat synchaar daka NPP.
Da khana u leh wa em boon ki Central Scheme ya ki wym jooh pynlait ka sorkar jylla heipor wa biang cha ka District Council deiwa ksoh ko da ki bnai, neitæ i daw thut i pynkreh wei pyndep yei kreh heipor wa biang, najrong wa thut leh i yoh yaki Installment wa toh u yoh ar soo tylli chi snem.
Heijooh i por u Brightstar da ong u wa ha ki snem chadien da man u uwa yaichah boi tæ ye u wow leh iwon iwon neibynta i myntoi ki paidbah kiwa da wan ood wan naam cha oo, hantæ ha kani ka kynti neidaw wym poi thaw cheiwon cheiwon tæ chim noh u ka rai u mih noh na ka NPP.
Kamtæ da kyrpaad u ya ki paidbah u pait u bichaar yei lai luti ka MDA wa yahkhmat ka NPP, deiwa kyntu leh u e laad noh da kiwi ki Party næ ka sorkar boi tæ ye u yoh i roi i paar hapoh ka jylla.
Da pynrap u leh deiwa ong wa em boon ki thaw wa ye ka District Council u yoh ka yarong poisa tang kani sorkar booh pathan ko daki kattu katni ki bru u pynlang poisa yow thap cha kata wym neibynta i myntoi ka sorkar jylla næ ka District Council.
Da ong u leh wa da chim bor khanglaad bait ka sorkar jylla ya iwon iwon wa mut ka District Council wow pynmih poisa.
Heiyatoh wa i mih u naka NPP, u Brightstar da ong u wa kattæ da man u kam u MDC samen wei wym pu em leh rai u wow psiah cha kawon kawon Party, wei i kyrchaan u ya u Andrew Shullai leh toh kam u bru samen.
Da ngait skem u wa la jia wan daka sorkar thymme u yoh i kylla hei rukom synchaar khadar i roi i paar wa kiwi.
