Katwa ka National People’s Party dang heh ko nei boon ki bru saiñ pyrthai kiwa psiah cha ka, ynne ka sngi neiliang u MDC ka NPP na Laban uwa man leh u Executive Member ha KHADC, u Mitchel Wankhar da phah u ya ka chithi cha u President wow mih noh na ka NPP nadooh ynne ka sngi 18 tarik.
U Mitchel da ong wa ym em u iwon iwon i pyrchah ya ka Party, tangwa kwah u wow em noh ha ki seiñ Ri-loom kiwa biang wow yahkhmat ya ka jylla. Da ong u wa ha ka lai luti daw syllok biang u wa ki paidbah wa kyrchaan ya oo kammon wow lai chaphrang.
Katkam ka khubor, da ong wa i mih noh u Mitchel toh wym tikna u wow yoh ya ka Ticket na ka NPP wow yakhun ya ka Election MLA 2023 na Mylliem Constituency. Tangwa hawa kylli, u Mitchel uwa da jop kam u MDC na ka NPP ha u snem 2019, da ong u wa hadooh katni ympu jooh em wa yaklam iwon iwon heiyatoh wa ka Ticket neibynta ka Election MLA.
Hadien wa mih noh na ka NPP, u Mitchel da ong u leh wa daw lai u chaphrang wow yakhun ya ka Election MLA ha u snem wow wan na Mylliem, wei katkam ka khubor wa da yoh uni u MDC ye u wow yakhun na ka United Democratic Party (UDP).
