Ka Montri sorkar jylla kawa pait yaka chnat Aiñ, ka Ampareen Lyngdoh ynne ka sngi da kam ko wa i yaklam wa kiwa yahkhmat ka Voice of the People Party man ko kawa mihsoh.
Ka Ampareen da yachem ko wa kiwa yahkhmat ka VPP hapoh i yahkhmat u President, u Ardent Miller Basaiawmoit hadien wa da pynman ki yei yakhih ha sarok yow dawa pynneh biang ya ki Investigating Officer ka Meghalaya Lokayukta kiwa da chah pyndam noh ini wa dep.
Hanla ka Ampareen da kam ko wa i yaklam toh iwa mihsoh tangwa da pyntikna wa chong ha u Montri Rangbah, u Conrad K Sangma wow yaklam biang wa kiwa yahkhmat ka VPP wei neiliang yong ka u pyntip ko cha u Montri Rangbah yow pyntikna u yaka sngi yachem wa kiwa yahkhmat ka VPP.
“Nga sñiawkmen O wow khana wa i yaklam waka VPP man ko kawa mihsoh. Da yaklam yei kyrpaad yong ki hajrong ka yurim ileh wa da pynkylla yei thung kreh haka Lokayukta wei kwah ki wow yachem wa u Montri Rangbah, wei nga daw phah ko ya kani ka khubor cha oo”, da ong ka Ampareen.
Da pynrap ko deiwa ong wa hawa chakri, hap i wow bood ya ki yurim ka synchaar paidbah. Neibhah wa da sangeh ki wow yakhih, wei u klam i hajrong kani ka kaam.
Da ong ko wa i yachem wa kiwa yahkhmat ka VPP chong i hei lait u Montri Rangbah u khut yaklam ya ki tangwa ym kwah ko wow yaklam yei dawa thung næ pynneh biang ya ki Officer kiwa da chah pyndam kreh na ka Lokayukta.
Discussion about this post