Shillong: I toor pood yong ka jylla Assam da sdang biang ko ynne ka sngi ha ka thaaiñ Ri-Bhoi, heiwa ki bor pynlai District ka Kamrup nadooh ki Magistrate wa ki pulit ya kiwa da synran lang da ki 400 ngut ki CRPF deilang wa 10 tylli ki Bus da lai ki cha ka chnong Pahambarngi Barapathar, Umtyrnga da i thmu wow seh ya ki moopood yow kam ya ki thaw cha ka jylla Assam.
Katkam ka yutip wa da yoh, ya katai ka thaw da dep wow lai sylli chwa leh da ki heh na ka Guwahati Municipal Corporation da i thmu pynman thaw noh jhep ha katai ka thaw, neibhah kini ki heh ka GMC leh da poi lang ki ynne ka sngi deilang wa ki laad pathai khubor na jylla Assam.
Hawa yoo ya ini i wan toor yong ki sahep ka Assam, neiliang ki tre chnong wa ki tre thaw da lai yieñ pyrchah ki wow khang ya itai i thmu yong ka sorkar Assam. Neiliang ki bor pynlai chnong da pyntip noh ki wut wut cha ki bor pynlai District ka Ri-Bhoi, wei mar ya yoh yutip ya ini i jia, neiliang ki pulit ka Pillingkata hapoh i yahkhmat u Magistrate na Nongpoh, u H K Thabah da lai hiar ki cha katai ka thaw.
Hadien wa poi ki bor pynlai District na Nongpoh da ye wow khanglad ya itai i thmu yong ka Assam wow kam ya katai ka thaw wei da pynsangeh noh ya i thmu wow thung moopood, wei hadien i yaklam pynbait na ki arliang mamla, ki bor pynlai ka Assam da lai liwan noh ki.
Kam wow pynche wa ki thaw Pahambarngi da em ki thaw tylliat moo kawa man i thaw yong ka Lumlang Shylla wa kiwi ki tre thaw neibhah katai thaw man ko kawa heh hadooh 12 Acre.
Discussion about this post