Ka Khasi Hills Autonomous District Council (KHADC), da mynjur ko ya ka Report yong ka Select Committee hajrong ka Khasi Hills Autonomous District (Constitution of District Councils) (Amendment) Rules 2024, yow pynbait thymme ya ki Constituency.
Katkam i pynbait thymme ya ki Constituency wa da mynjur da ka KHADC, ki Constituency da ya sariem i rukom em ki chnong kam hapoh ki MLA Constituency, heiwa kiwa boon ki chnong da ye wow pynhun wa kynthup ya ka Mawroh kawa da chah pynneh hapoh Mawlai wei ka Laban kawa duna bha i em paaid da ye wow pynlai hapoh ki chnong wa jooh em ha Malki wa Laitumkhrah waroh chi kattu.
Ki Constituency wa boon ki chnong wa da chah pynhaap noh cha kiwi ki Constituency kynthup ki ya ki chnong wa haap waroh chi kattu ha Mawshynrut kiwa da pynhaap noh hapoh Rambrai-Jyrngam Constituency, kiwa haap hapoh Nongspung-Sohïong da pynhaap noh cha Mawphlang Diengïei, na Parïong-Mawthadraishan kiwa boon bha ki chnong da pynhaap noh cha Nongstoiñ.
Kam wow kdaw heini wa ka Delimitation Committee da e kti ko ya ka Report cha ka KHADC hajrong i pynbait thymme ya ki MDC Constituency, wei neiliang ka Yung Dorbar ka KHADC da phah biang ko ya kani ka Report cha ka Select Committee kawa da chnong bichaar yow pynbait ha ka 20 wa 21 tarik uni u bnai, heiwa da wanrah yei mynjur ynne ka sngi hapoh ka dorbar kyrpang wa da pynman.
Neiliang u Deputy CEM, u Pynshngaiñ N Syiem da pynsñiaw u yei kmen wa ka KHADC da ye ko wow pyndep ya kani ka kaam chwa wow kut i por wa da pynyinsur yei man MDC wei da pyntip leh wa ka KHADC daw phah noh ko myntu hi ka sngi yeini i pynkylla cha u Lat ka jylla yow yoh ya ka muhor.
Discussion about this post