Ka Dhab ki Montri (Cabinet) yong ka sorkar MDA ha ka ha ka yalang kawa da man ynne ka sngi da rai ko wow lai chakhmat wow pynkrehkaam ya ka Code of Criminal Procedure (CrPC) wa ka Civil Procedure Code (CPC) ha waroh kawi ka jylla hadien wa ka sorkar da pynkhlaad ko yei bor yong ka Kachari (Judiciary) wa ka bor sorkar næ ka Executive katkam ka Sub-Section (2) yong ka Section (1) ka Code of Criminal Procedure 1973 wa ka Civil Procedure Code (CPC), 1973.
U Montri Rangbah ka jylla, u Conrad K Sangma da ong wa waroh ki kaam yong ki Kachari ka District Court katkam ka Rules yong ka Administration of Justice & Police ha Khasi, Jaiñtia Hills wa ha Garo Hills toh kiwa haap ha ka kyndon yong ka Code of Criminal Procedure, 1973.
Da ong wa ka sorkar da rai ko wow pynkrehkaam ya kini ki ar tylli ki aiñ hadien wa da yoh yei pynche na ki District Council hajrong kani ka bynta. Da ong u leh wa i bor yong ki kachari ka District Council Court daw pteiñ wow kreh ki katkam ka Paragraph 4 wa 5 ka Sixth Schedule ka riti synchaar ka ri India.
U Montri Rangbah ka jylla, u Conrad Kongal Sangma da ong u wa ym em de i artatien hawa yatoh wa i pynkrehkaam ya ka CrPC wa CPC, heiwa da ong leh wa ki District Council ki sñiawtieñ ki da knieh noh yei bor yong ki, wei neiliang ka sorkar da dep ko wow pynche wa ym toh wow knieh yei bor yong ki ADC, neibhah da e bor ha ka Sixth Schedule wa kayi wa da dep wow mynjur ha Parliament ym ye wow pynkylla da ka sorkar jylla.
