Ynne ka sngi da chong yalang ka dhab ki Montri ka sorkar jylla heiwa da yaklam hajrong san tylli ki mat kiwa da yoh leh yei mynjur katkam wa pyntip da u Montri Rangbah ka jylla, u Conrad Sangma.
Ka mat wa nyngkong toh ki khusnaam haka Meghalaya Day heiwa da chim ya ka rai wow pynkupburom ha ki le tylli ki bynta kamwa jooh leh wei ya i pyrtuid ki bru daw pynbna ha ka lehkmen Meghalaya Day.
Da chim leh yaka rai heiyatoh wa ki Montri kamjooh ki MLA ki wow pynhær yaka lama le rong ka ri haka Republic Day wei yei pyrtuid wa i thaw daw pynbna hadien.
Ka mat wa le toh wow tynyap noh ya ka aiñ Meghalaya Civil Task Force Act, 1974 wei u Conrad da ong u wa i daw wa tynyap ya ka toh wym yahaap de ko waka juk wa katni wei ya kiwa kreh wa em le tylli daw thap noh cha kiwi chnat ka sorkar wei ya uwi daw ksoh pura da ka yung krehkaam u Chief Inspector of Boilers & Factories. Yow pyndep yeini daw rah ya kani hapoh ka Dorbar Chna Aiñ.
Da mynjur leh wow pynheh ya ka bhah poisa ha ka Contingency Fund ka sorkar jylla neibynta u 2024 katkam ka Meghalaya Contingency Fund Ordinance, wei u pynheh ya ka naka Rs. 500 klur cha ka Rs. 1,000 klur.
Ka mat wa khaddooh toh wa da pdiang toh ya i rwai ka jylla namo ka State Anthem, heiwa u Conrad da e khublei u ya ka chnat Arts and Culture wa waroh kiwa boon kiwa embynta wow chna ya ini i rwai wei daw pynlait paidbah ya ini mynstep ka sngi ha Tura.
Discussion about this post