I joor u slap ynnin i miet da wanrah i yei chong syir ha ki bynta ka Ri-loom Garo, wei neiliang ki bor District da pynsmat ki wow e yarap wa ki laad yada cha ki thaw wa da chah ktah nei chlai um wa i oor khyndaw.
Katkam ka khubor wa da yoh, na ini i wan u slap da em i oor khyndaw heiwa le ngut kiwa naka jooh ka yung da chah tlep im ki ha ka chnong Jebalgre iwa haap hapoh ka Gambegre Block, West Garo Hills wei kamjooh ha Samati wa em ha Betasing Block ha South West Garo Hills da khlaad uwi u khynnah katwa ha kiwi ki bynta da joor i chlai um.
U Montri Rangbah ka Jylla, u Conrad K Sangma da ong u wa katkam ka yutip wa da yoh ka um ha ki bynta ka West wa South West Garo Hills da ku bha ko nei joor u slap wa khlem sangeh. Da ong u wa ki bor pynlai ya kini ki District da paitbniah bha ki heiwa da lai ki cha ki thaw wa da chah ktah.
Chooh chooh da ong u wa ka sorkar da phah ko ya ki Deputy Commissioner wow pylnait ya ka poisa yarap cha ki manyung wa da chah ktah ha ini i joor u slap wei wow pynlang yutip yeiwa da oor wa iwa chah ktah.
Da ong u wa kam ini i jia na ka rymaw ymye wow kiar, tangwa da ong u wa neiliang ka sorkar daw pyrchang ko wow thooh luti wow yada ya ki paidbah wow pynbiang yeiwa emkaam.
U Conrad da ong u leh wa daw lai pait u mynstep ka sngi cha waroh ki thaw wa da chah ktah nei chlai um.
Puræ leh: Khlaad soo ngut ha Ri-loom Garo nei oor khyndaw hadien wa joor u slap
