Shillong: I dawa wow khut noh ya ka dorbar wa kyrpang ha KHADC neibynta wow pynhaap noh ya u CEM ka KHADC, u Pynshngain N Syiem da ki 17 ngut ki MDC u man ko mynstep ka sngi, wei neiliang ki 17 ngut ki MDC da pynkhreh ki wow wanrah ya i wym chaniah de yei man u Pynshngain kam u CEM. Kani ka dobar u man ko ar sngi ha ka 10 wa 11 tarik.
Kini ki MDC da khut jhan ki ya ka yalang ynne i janmiet wow chna sa ya ka sorkar synrop ha KHADC, kawa da e pyrtuid ka Khasi Hills Democratic Alliance (KHDA).
Hapoh ka KHDA da e m 17 ki MDC wa kynthup ya 5 ngut na ka UDP, 4 PDF, 4 NPP, 3 HSPDP wa uwi u MDC samen. Kini ki MDC da ieh ki leh ya ki kaam wa ksoh ki hapoh ka PDA wa kynthup ya ka kaam Chairman wa Executive Member.
Kini ki 17 ngut ki MDC da pyntip ki wa i daw bah yong kani ka yakhih yong ki toh neidaw i leh mon ware u PN Syiem ya ka poisa yong ka Council wa da yoh na ka sorkar pyrdi wa i knieh ya waroh ki kaam wa i thung kamjooh wow pyndooh EM katwa sñiawbiang u kamwa da ong u HS Shylla.
U Antonio War da pyntip u wa kini ki MDC da ong ki leh wa da ya soi lang ki ya ka chithi wow dam noh u kyrchaan ya ka People’s Democratic Alliance (PDA).
Heijooh i por leh da ong ki wa smat ki wow krehlang wa waroh ki MDC hapoh i yahkhmat ka KHDC.
“I ym kwah i wa u PN Syiem u resign u kam u CEM hachwa ka pynyoo bor, neibhah ki MDC ki kwah ki wow klam pynche hakhmat ka dorbar yeiwa leh u wei lada resign u pynyoo yei tieñ u wei daw paw biej i,” ong u Shylla.
Hei yatoh wa i bynta ka KHADC wa ki Kharmator ha Them Iewmawlong, neiliang u HS Shylla da ong u wa u CEM ym em u ye u leh iyi iyi leh neibhah kani ka kaam da wanrah wow yaklam da u MDC ka Sohryngkham ha ka dorbar la 2 snem nachwa, tangwa u CEM ym em leh u iyi iyi leh hajrong ini.
“I da yooluti ki wa u CEM u khut u ya ka dorbar kyrpang ha i por wa yakhih neibynta ka Them Iewmawlong wow ya phyllu yumut ki MDC, tangwa ym em leh u ya ini,” da pynrap u Shylla.
Discussion about this post