Heiyatoh wa i ood kiwa boon ki khynroo khyllood kamjooh ki paidbah ka jylla yei wym yoh khih yoh kreh neidaw wa duna i kreh sorkar, neiliang u Wailadmiki Shylla, u MLA ka Jowai won ong u wa ka jylla yong i em ko chiboon ki laad ki kabu wa ye u yoh kreh yoh khih lada i hi bien i wow chimkhia yei sap wa em næ chimkhia ya iwon iwon i kaam wa lai chah hikai.
Hajrong wa boon ki seiñbhalang wa dawa bha ki u yoh ILP ka jylla yow lait nei wan psiah wan chong chnong ki bru wa na baar, da kylli u wa jooh pyrkhat hi i mo neiyi i daw wan ki cha ka jylla yong i deiwa hun u ieh yaka yung ka sem?
Da pynche u wa i daw toh wa ki bru na baar chynna ki ya chiboon ki laad yoh khih yoh kreh wa em ha ka jylla Meghalaya iwa ki bru yong i wym bien ki u kreh.
Kamtæ da kyntu u ya kiwa chong chnong ka jylla wow kreh da ki hi yei kreh wa leh ki baar jylla, wei wow pynpliah yeiwon iwon i kaam khnang yow lait ki u wan cha ki chnong ki thaw yong i.
Yeini ki kyntien da klam u haka yalang wai ya ka Skill Mela wa arsngi wada pynman daka Meghalaya State Skill Development Society ha Kiang Nangbah Government College, Jowai ynne ka sngi wa da chimbynta da ki khynroo khyllood.
Kamwa boonsien yoo u ki jooh bait ki khynnah wa lai ha kiwi tawon ki e sikai (Training) leh, deiwa sangeh næ kylla i pyrkhat hadien wa chah hikai na kiwi tawon ki e sikai, kamtæ da kyntu joor u wow rai ki u pynpliah heiwi don i bynta wei wow pait chwa leh ya ka yaw ka haat heithaw wa mut u seiñ yei kreh i khih.
Da pynrap u deiwa ong wa ka pyrthai katni wymtoh de kam nachwa wa lada em du i kyrdan puræ leh da biang, tangwa katni natlor wa em yei kyrdan da emkaam leh wow pynpliah heiwon iwon i kaam yow ye u ku chaphrang.
