Ynne ka sngi, ka Jaiñtia National Council (JNC) da pynman ko ya i lai paidbah ha Khliehriat, East Jaiñtia Hills wow pyrchah yei thmu wow wanrah luti rel ha Ri-loom Jaiñtia.
Ha ini i lai paidbah deiwa rah lama yong da kbai ya ki kyntien wow beiñ ya ka sorkar, i dawa ya ka Government College, wa kiwi de heiwa ki dukan ki baar jylla ha tymbud sarok leh da khang dukan noh ki.
Ha kani ka lai paidbah da emlang leh ki seiñbhalang waphær waphær nadooh ka FKJGP-Khliehriat Circle, MPUF-East Jaiñtia Hills District, All Biate Students Association, UHM-EJH, JYF, ka East Jaiñtia Hills Taxi Driver Association wa kiwi.
Manda poi ha yung krehkaam u DC, da em ka yalang wa pynlai da u W. Suting heiwa da yoh i klam na u T. Darnei kam u Secretary ka All Biate Student Association uwa da e khublei ya ka JNC wa pynman ya kani ka yalang wei da pynsñiaw u yei pyrchah ya ini i thmu wow wanrah ya ka luti rel neibhah wa da boon ki thaw wa da wan sorjamin ka sorkar ha thaaiñ Saipung.
Da ong u wa i wan ka rel ym pynmyntoi ko ya ki paidbah wei daw wanrah ko chiboon ki bru na baar jylla iwa ye u ktah ya ka rukom im ki jaitbru yong i wei tang u sarok ym em chna tangwa ya ka luti rel da thmu wow wanrah.
U President ka FKJGP-Khliehriat Circle, u Michal Chyrmang da ong u wa ka seiñ pyrchah joor ko ya ka rel khlem em ki aiñ wa biang deiwa ong wa i wan ka luti rel kit mar kammon u dam ko u kit bru.
Da ong u wa ki karkhana pynmih khyndaw-bilat donhi wow myntoi na ka luti rel wow kit ya ki mar wa pynemkaam wei pynmih ki wei ka luti rel daw ktah ko ya ka ki bru yong i kiwa em Truck neibhah daw dooh khih dooh kreh lut ki deiwa maham wa lada wanrah ya ka rel daw hap thæh da i snaam pyrchah ya ka sorkar.
Chooh chooh da ong u wa nachwa ki karkhana khyndaw-bilat kular ki wow e kreh 60-70% ya ki tre jylla tangwa katkam wa man katni da tam boon da ki baar jylla wa kreh ha ki.
U Oswald Nampui uwa man u President ka JYF-Saipung Circle da ong u wa da em ki bru wa wan sorjamin ya ki luti ki kpær ki bru heiwa da niaam rong da wan thoh dak ki wow chna ya ka luti rel wei katwa boon ki bru na Saipung toh kiwa im nei rep, i wan ka rel daw ktah bha ko ya ki.
Da ong u wa dang miat ya ka sorkar wow chna ya ki skur wa ki thaw sumaar heithaw yong ka luti rel.
U Kyrshan Blah uwa man u President ka MPUF-East Jaiñtia Hills da ong u wa kam ka seiñ kyrchaan ko ya i yakhih ka JNC deiwa ong wa katkam wa da yoo katni da boon ki baar jylla hapoh ka District kamtæ da pyrchah joor yei thmu wow wanrah ya ka luti rel deiwa maham wow mih paidbah.
Da kyrpaad u ya u Montri sorkar uwa man u MLA ka thaaiñ, u Kyrmen Shylla wow pait chwa ya ka thaw sumaar ha Khliehriat kawa em chiboon i duna nadooh kiwa kreh, deiwa ong wa i wanrah ya ka rel toh wow kit ya ki mar ki hehspah donhi, kamtæ da kyntu u ya ki dorbar chnong wow pyrchah ya ka rel wei wow wanrah ya ka aiñ wa khlan kam ka ILP.
Ka Bythygrace Dkhar kawa man ka President ka Meghalaya Indigenous Women’s Council, da ong ko wa ka JHADC ym em pynkrehkaam ko ya ki aiñ wow pait ya ki Trading License heiwa boon ki dukan baar jylla ym em ki ya ki kot ki sla wa emkaam wei ini booh i hei maa ya i wei katwon boon chah lada wan ki luti rel.
Da ong ko wa ki thaw yong i dang man kiwa yirngam tangwa i wan ka rel daw wanrah ko du i jhep wei u myntoi leh du ki karkhana khyndaw-bilat donhi heiwa ka mat wa haphrang dooh ha East Jaiñtia toh ya ka Government College hapoh ka District.
U President ka JNC, u Sambormi Lyngdoh da ong u wa ka seiñ pyrchah joor ko ya i thmu ka sorkar wow wanrah ya ka rel ha Ri-loom Jaiñtia wei i thmu ka sorkar toh wow wanrah ya ka luti rel lyngba ka thaaiñ Saipung kawa em ha khappood waka Assam.
Da ong u wa tieñsar ya chah pynbiej ki paidbah ha i dur ka Land Compensation tangwa emkaam wow lai cha Saipung wow pynsñiawthooh ya kiwa boon heiyatoh wa ini i kaam.
Chooh chooh da kylli u iyi em cha lyndet yong i thmu ka sorkar hawa da em chwa ki mat dawa wa sahteiñ da slem tangwa heiyatoh wa ka luti rel smat ka sorkar neibhah wa ye u man wa chah pynbor ka sorkar ha ki karkhana pynmih khyndaw-bilat.
Da ong u wa heipor wa wan kini ki karkhana da kular ki wow e kreh ya ki tre jylla tangwa katni katkam wa man hi, waroh kiwa kreh ha kini ki karkhana toh kiwa na baar heiwa ki yong i ki bru toh kiwa rah that niaam tyngkong donhi.
Heijooh i por da ong u wa hanlada ympu em ka luti rel katni sang boon ki baar jylla lada wan pathan ka rel tæ wot u pynman Rally leh ym man de neibhah daw man ka jylla kam ka Tripura.
Da ong u leh wa lada ym pynsangeh ya ka rel, neiliang ka JNC daw yalap pyrchah ko ya ki 7 ngut ki MLA wa katni hapoh Ri-loom Jaiñtia.
U Sambormi da khana u leh ya ki thong yong ka Save Jaiñtia Mission deiwa ong wa ka seiñ daw lai khyndang ko ya ki dukan ki baar jylla kamjooh ya ki baar jylla wa kreh ha ki karkhana pynmih khyndaw-bilat, wow dawa tipmit ya ka ktien Pnar ha ka jylla, ka Policy thung kreh, u pynbait ya u pood ka Ri-loom Jaiñtia katkam u snem 1951 wa kiwi kiwi.
Discussion about this post