Shillong: Hadien ka yakhih chong kyllaiñmynngor wa 5 sngi wow dawa pynkrehkaam ya ka Inner Line Permit (ILP), ka Confederation of Meghalaya Social Organisation (CoMSO) ynne ka sngi da pynbna ko wow pynkrehkaam noh ya ka ILP nadooh ka 12 tarik uni u bnai neidaw wym mano ka sorkar India wot hadien wa ka jylla da rai ko wow pynkrehkaam ya ka ILP ha ka yung dorbar MLA.
Neiliang u Chairman ka CoMSO, u Robertjune Kharjahrin da ong u wa nadooh ka 12 tarik ki dkhot daw kynreh hi noh ko da ka hi deiwa booh ya ki khyrdop ha ki thaw waphær waphær wa ha ki thaw wa da em chwa kam ki Infiltration Check Gate, ki dkhot ka CoMSO u yakrehlang ki wa ki pulit wow pynuiñ ya ki bru wa wan psiah tooh.
Heijooh i por u Chairman ka CoMSO da pynbna u leh wa ka seiñ daw kynreh ko ha ki thaw wa ki chnong wei lada chem ya ki bru wym biang kot daw phah liwan ya ki.
U Kharjahrin da ong u wa ba lada ki bor wa hajrong dang kheiñstiñ ki ya kani ka yakhih wa jaijai, ka CoMSO ym ap de ko tangwa u pynkrehkaam bait ko ya ka ILP ka yong ka hi.
Da ong u leh wa i kaam ki MLA ympu kut i du hadien wa dadep chim ya ka rai ha ka dorbar, tangwa wow chimkhia wow pyntikna wa kani ka rai u krehkaam ko.
Da pynbaad u leh wa ya ki jaitbru wa em ki seiñ kieñ suloi, ka sorkar India da e lut ko katwa kwah ki, tangwa ha Meghalaya kawa dawa du ya ka ILP leh ym ap ko wei lada ka sorkar kyntait ko ya kani ka kynti ka jaitbru u pyrkhat noh ko deiwi.
Discussion about this post