Shillong: U Montri Rangbah ka jylla u Conrad K Sangma da ong u wa ka sorkar Assam da pynsangeh wow chna ya ka Police Outpost ha Umru kawa haap ha Ri-Bhoi District nadooh ka 23 tarik u Wisu hadien wa ka sorkar Meghalaya da lai tuklar ko ya ini i kaam.
U Conrad da ong ya ini hawa jubab ya ka mat wa da wanrah da u MLA ka Umroi u George B Lyngdoh hajrong i thmu yong ka sorkar Assam wow booh ya ka Police Outpost ha katai ka chnong.
U Conrad da ong u wa u Deputy Commissioner ka Ri-Bhoi da yaklam u wa u Deputy Commissioner ka Hamren, West Karbi Anglong District ha ka 20 Wisu wei kamjooh leh ya u Chief Secretary ka jylla ha ka 22 Wisu wei da yaklam u leh wa u Chief Secretary ka Assam wa toh wow sangeh yei chna ya ka Police Outpost wei hadien ini i tuklar ka sorkar jylla, ka Assam da pynsangeh noh ko yei kreh nadooh ka 23 u Wisu.
Heijooh i por, u Conrad da ong u leh wa da phah ya ki Superintendent of Police ka Ri-Bhoi wei kamjooh na ka Hamren, Assam wow sonteri ki ya kani ka thaw yow lait na iwon iwon i huri hura.
Discussion about this post