15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt

Nadooh 7 hadooh 16 tarik u Naichiphaw ka Exam Final Semester, 31 tarik ka Result, paan ka sorkar naka UGC

Advertisement ad1
Advertisement ad1
Advertisement ad1

Shillong: Ka sorkar jylla ynne ka sngi da rai ko wow thoh cha ka University Grants Commission (UGC) wow phah kyrriah ya ka Exam Final Semester cha u bnai wow wan, wei kini ki Exam toh neibynta kiwa puræ ya ka Under Graduate wa Post Graduate.

U Montri wa pait yaka puræ puthi ha ka jylla, u Lahkmen Rymbui da pyntip u wa ka sorkar hadien wa da bichaar bha ha ka yalang ynne ka sngi, da rai wow thoh cha ka UGC, deiwa booh leh ya i e yumut wow pynman ya ka Exam nadooh ka 7 hadooh 16 tarik u Naichiphaw (Oct) wow wan, katwa ya ka Result da e yumut wow pynbna ha ka 31 tarik utai u jooh u bnai.

Da pyntip leh wa ka chnat i chait i khiah da dep ko wow yaklam leh wa ki bor pynlai ka North Eastern Hills University (NEHU) hadooh arsien hajrong kani ka phang neibynta wow e myntoi ya kiwa lai puræ.

“Hadien wa da yaklam wa ki bor pynlai ka NEHU, ka sorkar ynne ka sngi da rai ko wow thoh bait noh cha ka UGC neibynta wow pynkylla ya ki sngi wow pynman ya ki Exam, kitæ ha ka 7, 9, 12, 14 wa 16 u Naichiphaw wei yaka Result toh u pynbna hapoh ka 31 tarik u jooh u bnai,” da ong u Rymbui.

Da ong chooh chooh wa i pynman ya ki Exam u man ki da ki Online wa ha ki Centre, wei ya ini da ekti ha ka NEHU kammon wow pynlai neibynta kiwa lai puræ kiwa kwah wow yaleh Exam na yung da ka Online wei lada em ki ha ki thaw wym biang ki Network, næ kiwa ym ye wow wan cha Shillong, ye ki wow lai thoh ya ki Exam ha ki Centre yong ki District wa em ki. “Neibynta kiwa puræ PG, waroh toh u man ko Online wei ka NEHU daw pynbait ko kammon wow phah ya ki thup kylli,” da ong u.

Katkam wa pyntip u Rymbui, waroh kiwa daw yaleh ya kitai ki Exam da em ki 24000 ngut, kiwa kynthup ya kiwa puræ wa toh u yakhun ya ka Final Semester ha ka PG kiwa du na ka jylla kiwa em 1300 ngut katwa kiwa na baar em ki kamwa 700 ngut, wei kiwa hap wow yakhun ya ka UG em ki 19000 ngut na ka jylla wa 3000 ngut na baar ka jylla.

Hawa kylli, u Rymbui da pyntip u wa ini i rai yong ka sorkar toh hadien wa yoo yeiwa pynsñiaw kiwa lai puræ neidaw i chah ktah na ka khlam COVID-19, wei i e por toh yow yarap ya ki khynnah puræ wow pynkhreh hanla man ko du kamwa chi bnai.

Kam wow pynkynmoo wa ka University Grants Commission (UGC) da pynmih ko ya ka hukum ha 7 tarik u Naiynniaw wa toh u pyndep ya waroh ki Examin UG wa PG hachwa wow kut Naisaphra uni u snem, tangwa neidaw wa em leh i pyrchah na kiwa boon ki liang, kani ka kaam da poi ko cha ka Kachari, heiwa ka Supreme Court da pynksan ko ya ka UGC, deiwa e laad leh ya ki sorkar jylla wow thoh cha ka UGC neibynta wow pynkylla ya ki tarik pynman ya ki Exam.

Share this:
Previous

Daw pyndep ka Seiñraij Mynso ya ka lehniam Behkymphui 2020 ha ryngkat ki kyndon

Next

Phah pyndam noh ka sorkar wow pynman thaw leh Quarantine ya ki skur, nadooh ka 21 tarik kiwa sikai da ye ki wow lai skur