Ka Hynñiewtrep Border Dispute Redressal Forum (HBDRF) da ong ko wa ki Karbi kiwa sah ha khappood wa ka Lapangap wa tyngkheiñ nyngkong ya ka Status Quo wa da mynjur da ki ar jylla hawa i yaklam pynbait pood ka wat wa ar namo ka 2nd Phase dang lai ko.
Ha ka 25 tarik da mih i ya kynaad wa joor hapyrdi ki paidbah ka Lapangap wa ki Karbi hadien wa kiwa chong chnong da lai ki wow phut ya ki tre dieñ wa da thung da ki Karbi. Wei ini i kynaad ym em da kut ko du hapyrdi kiwa chong chnong wa ki Karbi, tangwa da mih leh i pynyoo nia hapyrdi ki bor pynlai District yong ka West Karbi Anglong wa ka West Jaiñtia Hills District.
Neiliang ka HBDRF lyngba u Adviser, u Thomas Passah ynne ka sngi Thohdieñ da lai e ki dei thoh cha u Montri Rangbah ka jylla yow khana yei daw wa da jia ha ka 25 tarik.
Katkam wa ong u Thomas, ki Karbi da tyngkheiñ nyngkong ki ya ka Status Quo ha ka 10 tarik deiwa lai thung dieñ hapoh u pood u ang ka chnong Lapangap ha Meghalaya khlem da pyntip næ yohbor chwa. Ym du itæ, ha ka 19 tarik ki bor pynlai District ka West Jaiñtia Hills da pynsñiaw ki yei pyrchah ya ini wa leh ki Karbi, wei hei yachem wa ki bor ka sorkar Assam ha ka yalang da rai leh wa emkaam wow pynneh yei suk i saaiñ ha ka thaaiñ waroh kawi, tangwa ha ka 25 tarik ki Karbi da pteiñ biang ki wow thung dieñ iwa pynman ya kiwa chong chnong wow lai phut noh ya ki tre dieñ iwa da yah chei ya kynaad hadooh wa dapoi chei ya kawang moo wei siat Tear Gas.
U Thomas da khana u wa ha katai ka thaw wa mihi i kynaad da em ki ki pulit Assam hadooh ynnin ka sngi, wei neiliang ka HBDRF da kyntu ko ya ka sorkar wow phah rap boon chooh ki pulit Meghalaya cha katai ka chnong yow yada wei yow lait na iwon iwon i jia.
Discussion about this post