Hadien wa u Himanta Biswa Sarma, Montri Rangbah ka jylla Assam da kam u hapoh ka yung dorbar chna aiñ wa ka chnong Mukroh haap ko hapoh ka Assam ha i por wa e jubab yeiwa da kylli da uwi u MLA ka thaaiñ Karbi, u Bidya Sing Engleng.
Ynne ka sngi neiliang ka seiñ Hynniewtrep Border Dispute Redressal Forum (HBDRF) lyngba u Chairman yong ka, u Chandame Sungoh, u Convener ka Movement for Change, u P. Samaiang wa ka Secretary ka Hynñiewtrep Women Welfare & Development Organisation, ka B. Lyngdoh, ka Asst. Secretary, ka R. Ryngkhlem da beiñ joor ki ya ini i klam u Himanta Biswa Sarma deiwa ong wa ki tip ki 100% ka Mukroh haap ko hapoh ka jylla Meghalaya khlem da kdaw leh yei pynbna (Notification) wa da mih ha u 1957,1958 ter ter.
Tangwa deiwa pait ya ka Notification u 1951 leh da tip che wa ka Mukroh haap ko ha Meghalaya kawa da pynmih ha ka 13-04-1951 kawa da kdaw wei pynoo yei pyrtuid ki um ki wah, da ong u Chandame Sungoh.
Neitæ lada pait yei thaw wa mih ka wah Umkhyrmi kamwa kdaw ha ka Notification leh, ong u pynyoo wa dang jngai bha na chnong Mukroh.
Kamtæ hajrong i klam u Himanta da ong wa ini toh khlem yurim najrong wa daw wanrah kulmar khamtam ha ki thaw wa dang em hapyrdi i kajia pood, wei ki Karbi leh nang yoh bor chooh chooh wow leh ki kaam wa man pyrchah yei hok manbru ya ki Pnar wa em ha Block-1.
“Kat u CM da toh u pyrkhat wow klam deiwa chongnia wei dang bha chiboon wow ong wa ka Mukroh haap ko ha Meghalaya katwa ka Block-1 dang em ko hapyrdi i pynbait pood wei lada klam u ha kani ka rukom dang ye u pdiang wei leh ka chongsuk daw em ko ha ki thaw wa jooh mih kulmar” da pynrap u Chandame Sungoh.
Heijooh i por da kyntu u leh ya ka sorkar jylla wow chimkhia yei klam u Montri Rangbah ka Assam deiwa thoh deiwa toh rukom cha u Chief Secretary ka Assam hajrong ini i klam yong oo.
Neitæ wow pynkrehkaam noh ya iyi wa da dep tyrwa nadooh u 1958 lyngba ka Joint Inspection Inquiry ki artylli ki District Council ka United Cachar Mikir Hill kawa da tip katni kam ka Karbi Anglong Autonomous Council wa ka United Khasi Jaiñtia Hills kawa da tip katni kam ka Jaiñtia Hills Autonomous District Council.
