Haka yalang ynne ka sngi, ka kur Dhar ka chnong Thangthrieñ da pynyoo ko yei yatylli wow kyrchaan ya u Habahun Dkhar, u kyrtong ka NPP naka 4-Mowkaiaw Constituency, wei ya ini da pynsñiaw hakhmat u Sniawbhalang Dhar, MLA ka 1-Nartiang uwa man leh u Montri ka sorkar MDA deiwa emlang u Habahun Dkhar.
U Lingson Dhar naka chnong Saphai hei klam yong oo, da ong u wa i yatylli kam ka kur ka jait ha kiwon kiwon ki bynta man ko kawa emkaam bha, heiwa da e nongmuna u yei yatylli ka yung u Sniawbhalang heiwa da ku ha waroh ki liang, kawa man ka sarong ya ka kur ka jait waroh kawi.
U Habahun hei klam yong oo da e khublei u yei kyrchaan yong ki kur Dhar, da e khublei u leh ya u Sniawbhalang ye pyntipmit yong oo ya ki kur ki jait Dhar kiwa em hapoh ka 4-Mowkaiaw Constituency, da ong u leh wa lada poi cha ka thong kamwa da mut, ym myllin u yei mynsien yatylli ka kur Dhar.
U Sniawbhalang hawa e yei klam yong oo da ban joor u ya ki para kur wym hoi u em i mynsien adnood bichni wei wow man ki leh kiwa kreh chitom ha kiwon kiwon ki kaam khnang yow man ka kur kawa biang wa dap ha waroh ki liang.
Da kyntu u leh ya ki para kur yow man ki kiwa stat hei jied ya uwa mihkhmat wei yow kreh chitom neibynta wow pynjop emburom ya uni u kyrtong ka seiñ NPP kawa oo hi emlang u.
Ha kani ka yalang da yoh leh yei klam na ki kattu katni ki waheh, ki manbei wa ki khynroo naka kur Dhar kiwa da yaroh wei kyrchaan yaka NPP ha kani ka Election wa daw wan.
