Nei man khonswet chei man Montri sorkar, pynkup burom ka NPP Jowai Block ya u Wailadmiki

Ynne ka sngi ka National People’s Party, Jowai Block da pynkup burom ko ya u Montri ka sorkar jylla uwa man leh u MLA ka Jowai, u Wailadmiki Shylla ha Indoor Hall ka Chutwakhu wa em ha madan Jrisaleiñ.

Ya kani ka yalang pynkup burom da pynlai da u Kmenlang Dhar uwa man u Secretary ka NPP Jowai Block.

Ya u Wailadmiki da pynspong leh kam ka dak i maaiñ wow ye u chakri ya ka Constituency, ka Ri-loom Jaiñtia wa ka jylla waroh kawi.

Ha kani ka sngi da pynkup burom ya u Wailadmiki da ka NPYF, ka Women’s Wing wa ka Farmer Front kawa man ka chnat krehkaam yong ka NPP kamjooh da ki Unit waphær waphær napoh ka Jowai Constituency.

U Wailadmiki hawa e i klam da e khublei u ya waroh kiwa da embynta heiwa da ong u wa ka Jowai Constituency kawa da naam, kattu waroh kyruiñ biang ki cha ka. Da sñiawkmen u wa ini toh i jop yong waroh ka Jowai Constituency wa da yoh biang ko ya uwa mihkhmat wow ksoh kam u Montri ka sorkar jylla.

Chooh chooh da e khublei kyrpang u ya ka NPP Jowai Block wa da pynman ya kani ka yalang pynkup burom wa phooh.

U Wailadmiki da ong u wa ki Ryndia Tlem wa da pynkup ha oo ynne pynyoo ko yei chaniah ha oo wow chakri u ya ka jylla waroh kawi deiwa kynmoo u wa ha u 2017 man u kam u khonswet wow pynsñiaw ha ki paidbah wow e ha oo i bor wow chakri u ya ki paidbah ka Constituency wei ynne man i burom wow ksoh u ya ka chuki Montri ha ka sorkar.

Ki mat wa hakhmat wa booh u toh wow kyntu kynrong ya ki khonswet wa kiwa duna hei yoh i laa.

Heijooh i por da kyntu u ya waroh wow kynmoo ya oo ha i ngooh i dem hei duwai khnang wow yoh u yei doh i pran iwa khlan wow chakri ym du ya ka Constituency tangwa kam u Montri wa ksoh ya ki chnat waheh wa kiwa khia.

Da paan maap chwa u na kiwa kyrchaan neibhah wa ha ki por wa man u dang du kam u MLA donhi em ki por wym yoh ki u yachem wa oo tangwa kattu deiwa ksoh u yei kaam wa khia boonsien daw hap chong u ha Shillong wa cha kiwi ki thaw.

U Wailadmiki da ong u wa ka thaw sor ha Jowai ymtoh iwa suk wow yoh Vote neibhah wa man kiwa pyrkhat wei chynna jngai.

Da ong u wa ha ki snem kiwa dadep da em ki waheh kiwa kyrchaan ya oo wei katni dang em chooh kiwa da tyrwa yei chaniah heiwa da kular ki leh wow embyntalang wa oo ha u 2028 deiwa kyntu ya kiwa kyrchaan wow man kiwa yinsur mynsien wei wow em i mynsien wa krehlang neibynta ka Jowai Constituency waroh kawi.

Ya ki kyntien khublei da yoh na u Vice President ka NPP Jowai Block, u O. Lamar.