Ka wah Umngot kawa tip kam kawi na kiwa khooid wei kawi na kawa jngiar dooh ym du hapoh India tangwa hapoh Asia waroh kawi, da kylla ktieh ko ha kini ki sngi wa dep neidaw wa em i chna ya u sarok Shillong-Dawki.
Neiliang u President ka Meghalaya Rural Tourism Forum (MRTF), u Alan West Kharkongor da ong u wa ka Umngot da pawnaam ko kam kawa khooid wa jngiar hadooh wa yoo lakam wa hær ki lien hajrong ka um heiwa kini dur da yoo ki ha kylleiñ wei kiwa uiñke suwari leh da wan ki cha kani ka wah wow sakhi yeini.
Tangwa kattæ won dei ktieh neidaw i pynheh ya u sarok Shillong-Dawki wa da chna deiwa kyrchaan poisa ka Japan International Cooperation Agency (JICA) heiwa ya u sarok da pynkreh da ka NHIDCL heiwa neiliang u Alan da ong u kopsar ym em da leh yeiwa emkaam yow yada neini.
Da ong u leh wa kiwa uiñke suwari wa wan da pynbaad ki ya kiwa chong chnong wei lada ym khooid ka wah ha ini i por iwa man leh kam i por uiñke suwari daw man ko i dooh nong wa khroo.
Kiwa uiñke suwari kiwa da wan na jngai du wow yoo yei khooid kani ka wah da pynsñiaw ki yei dooh nong wei sñiawsih hawa jia kamni.
Heiyatoh wa ini, neiliang u MP ka Shillong, u Dr. Ricky AJ Syngkon da kyntu u ya Montri ka sorkar pyrdi uwa pait ya ki luti syngkieñ, u Nitin Gadkari wow tuklar u yeini deiwa ong wa ini i kreh ya u sarok Shillong-Dawki wa i ah ya ki loom wei noh ktieh toh i daw wa jia ini ya kani ka wah.
Da ong u leh lada ym ye wow pynkhooid smat ya ka wah daw ktah bha ko ya ki kaam uiñke suwari.
Discussion about this post