Ha ka 9 tarik uni u bnai heipor 11:30 i step da sakhi yei poor i Video iwa pynyoo wa oor ka yingkieñ wa dang chna hajrong ka wah Umiurem, ha i thaw wa tip kam ka Molachah, ha chnong Shangpung.
Kani ka yingkieñ toh kawa chna hajrong wow pynsuk ya ki warep haka thaaiñ wow kaap um ki manda kmai kani ka wah.
Neiliang u Wyrta da thooh yutip u hajrong ini i jia na ki kattu katni ki sahep ka chnat Soil & Water Conservation kamjooh na kiwa chong chnong heiwa da chem wa kani ka kreh man ko hapoh ka Rural Infrastructure Development Fund (RIDF) Tranche XXVI heiwa da pynkreh ya ka da ka chnat chirup wa ki bor chnong.
I jrong kani ka yingkieñ man i 37m wei neidaw wa oor kani ka yingkieñ syndet syndet kawa dang dep chna wot da suba wa nei wan syndet u slap ha ki tayaaw wa dadep iwa da pynkmai ya ka wah Umiurem wei da rong ko ya ki dieñ kyrchaan namo ki Scaffolding.
I dor wow chna ya kani ka yingkieñ toh da mang T. 20 lak tam wei neiliang ka chnat daw thooh ko ki laad wow leh yeiwa emkaam katkam wa da thmu ka chnat neibynta i myntoi ki warep.
