Jowai : U kyrtong wow yakhun Dolloi ka Jowai Elaka u Ram Rymbai ynne ka 24 tarik da pynman u ya ka yalang ka Central Election Committee heiwa da khut lang ya ki dkhot kani ka Committee yow phyllu yumut ya ki kaam hei yatoh wow jied ya u Dolloi wa pura ka Jowai Elaka.
Ya ka yalang da pyllai da u K. Rymbai, Chairman Election Committee heiwa u M. Rymbai da ong u wa da kyrchaan u yei rai yong u Ram Rymbai yow man kam u kyrtong wow yaleh yei kyrdan Dolloi ka Elaka Jowai hadien wa ong wa u (L) C. Rymbai uwa na yung na sem yong oo da chakri u kam u Dolloi ka Elaka Jowai wei oo leh kwah u wow pteiñ wei wow pyntam yei chakri ya ki khon ka Elaka deiwa bood dien yeiwa da da dep u yah luti u Dolloi warim ka Elaka.
Neiliang u Ram Rymbai da ong u wa i yurim wa yieñ wow yaleh ya ka kyrdan Dolloi toh kam u kyrtong da kular u wow bood ya ka aiñ wa pait ya ka kreh ki Dolloi nei bynta ka burom ka Elaka Jowai wei waroh i wow leh u, u man ki katkam ka aiñ wa bichaar ya ki Dolloi.
Kiwa kyrchaan ya u Ram Rymbai kam u B. Muktieh uwa man kam u Advisor ka Iongkalooh Dorbar Chnong da ong u wa da hun u yei kular u Ram Rymbai deiwa ong u wa oo daw pynim biang u ya ka Dorbar Elaka, kamtæ ki da rai ki wow kyrchaan ya u Ram Rymbai hajrong ka nongrim wow man u, u bru u wym baam poisa heipor wa chong bichaar u ya ki kaam paidbah.
U Tanbok Dkhar, Secretary, Tuber Kmai Chnong da ong u wa ki kwah ki ya u Dolloi wa ye u bichaar ya i hok ki paidbah khlem em i pyrkhat ya ka poisa wei ki kaam ki paidbah da e kti ki ha u Blai wow bichaar yei mynsien ki Dolloi. Da ong chooh chooh u leh wa lada pynemkaam da ka poisa yow ya thap Vote ya kam kitæ haap mylliñ ki neibhah ka jied Dolloi ym toh neibhah ka poisa.
Neiliang won u Word Sutong, Secretary ka Wapungskur da ong u wa ka synchaar khaddar katni da lai ko da ka aiñ u bru deiwa ym em mylliñ i ya ka dustur riti wei haap sñiawngooh i wa ka jied Dolloi dang burom ya ka da ka JHADC. Han lada dang yoo khynnah ya u kyrtong, tangwa hadien wa ong u wa kwah u bood dien ya u ma yong oo u tynde u K.C. Rymbai uwa man u bru wa bichaar salonsar kamtæ oo da rai u wow kyrchaan ya u Ram Rymbai.
Kiwi leh kiwa da klam da ong ki wa, ka kaam wow jied Dolloi ym toh neibhah ka poisa wa chna da u bru tangwa emkaam u jied ya u Ram Rymbai kam u Dolloi uwa dang khynroo uwa dang khooid.
Discussion about this post