Ka National People’s Party (NPP) da pynbna ko da uwa thoh khubor warim, u Allan West Kharkongor kam u kyrtong wow yakhun na Sohra ha ka Election MLA 2023.
Ya u Allan da pynbna da u President ka NPP Meghalaya, u Dr. Wanwei Roy Kharlukhi ha ka yalang pdiang burom ynne ka sngi ha yung krehkaam ka Party ha Shillong, heiwa da emlang leh u Montri Rangbah uwa man u National President ka Party, u Conrad K Sangma, u Symbood Montri Rangbah uwa man leh u National Vice President ka Party, u Prestone Tynsong wa kiwi kiwi de.
Hawa klam ynne ka sngi, u Allan West da ong u wa ym psiah Party kulmar u, tangwa psiah u neibynta ki kaam. Da ong u wa ki kaam uiñke suwari daw psiah ko cha ki thaw palatsor wow e khih e kreh ya ki paidbah wa chong chnong wei neini i daw da kyruiñ u cha ka Sohra ym neibynta wow saam tin saam Scheme tangwa neidaw wa ka Sohra em ko chiboon ki laad neibynta ki kaam uiñke suwari, tangwa hadooh katni dang yoh du 30% i myntoi wei kwah u wow yoh ka Constituency hadooh 70%.
Da yaroh u leh ya ki kaam ka sorkar hapoh i yahkhmat u Conrad kam u Montri Rangbah wa da pynman ya ka sorkar MDA wow ku ko, wei da pynrap u wa ya ka sorkar lada thooh da em bait ki daw tangwa emkaam leh wow kyruiñ cha ki kaam wa bha.
U Allan uwa man leh u dkhot ha ka Forum wow dawa District ya ka Sohra, da ong u wa kani ka sorkar toh kawa ye bait wow pynman kaam ya iwon iwon, wei da toh wow pynman kaam noh ko ya i kwah wow yoh ya ka Sohra District yong ki paidbah, heiwa da pynsñiaw u wa ki paidbah yooluti ki wa ka District daw man ko kam i e sñiawbha Christmas.
Puræ leh: Pynbna ka NPP da u Allan West Kharkongor kam u kyrtong na Sohra
