Hadien wa ini wa dep da jia wa em kiwa lai noh wei lai booh dei doh masi ha ki Temple ki Hindu ha Assan, kattæ won da jia wa uwi u khynroo da noh u dei doh sniang ha i Masjid ki Muslim wa em ha Guwahati dei thmu wow daisarom ya kawi ka kynthai wei ya ini da yoh leh u riñ da ka CCTV iwa da jia ha ka 6 tarik uni u bnai.
Uni u khynroo toh u Mridupawan Pathak wei da chah kem u ha ki Dispur Police ha ka miet ka 8 tarik hadien wa noh u dei doh sniang ha iwi i masjid ha thaaiñ Panjabari ka nongbah Guwahati.
Ya ini i doh sniang da thap ha kawi ka yusong wei hapoh da em leh i kot wa thoh yei pyrtuid kawi ka kynthai wa i Number Phone ko.
Ki pulit da ong ki wa u Pathak da phah kylli u ya kani ka kynthai tangwa da kyntait noh ko ya oo kamtæ da thmu u wow daisarom ka deiwa leh kamni heiwa da thoh u heitæ i rukom wow yoo lakam ka kynthai wa thoh ya kani ka chithi wa pynkhon ko wei da chrai ko ya u chynrang tæ lai noh ko da ini i doh sniang wei i thmu u toh yow kem ki pulit ya kani ka kynthai.
Ki pulit da kem ki ya u Pathak hajrong i thmu wow wanrah yei sñiaw yaphær niam wei wow daisarom ya kani ka kynthai.
Katkam wa yoh u riñ da ka CCTV da yoo yei em wa wan u da ka Scooty wei da kawang u ya ini i doh sniang wa song hapoh kawi ka Plastic.
Discussion about this post