U Montri sorkar kamjooh u MLA ka BJP, u Sanbor Shullai da pynche u yei mih khubor iwa da jia ha ka yalang wa da pynman ha Orchid Lake Resort, Umiam ha ka 6 tarik uni u bnai heipor wa wan ka kyrtong President ka NDA deiwa ong wa iwa da jia toh iwa da sñiawthooh bakla wei ym em leh iyi iyi i thmu wa sih.
U Sanbor da ong u wa daw lai u dei bru yow yaklam wa u Montri Rangbah heiyatoh wa ini manda liwan u na Kolkata wei daw paan maap u lada chah ktah kiwon kiwon ha katai ka yalang.
Da ong u leh wa ini wa da jia da pynheh chawa palat hadooh oo leh da khyrngiat u hadooh wa u para MLA ka Party, u AL Hek leh da pyrchang u wow yoh myntoi na ini waroh.
Da ong u leh wa ini wa jia toh hapoh ki dwar wa khang tangwa da bna paidbah. Kamtæ da ong u wa heiyatoh wa ka phang i chah thombor ki Christan wa da wanrah da uwa yahkhmat ka UDP, u Metbah Lyngdoh, u Sanbor da ong u wa hei sñiaw yong oo samen ym ye wow pynbaad ya ka BJP yeini wei ym toh ka rynsan wa biang wow yaklam yeini. Chooh chooh da ong u wa ka kyrtong President ka NDA da wan ko yow paan yei kyrchaan wei u wanrah ya kiwi ki phang ha kani ka yalang toh i wym biang wei ym toh iwa emkaam.
U Sanbor heijooh i por da ong u wa lada ki phang wa da wanrah toh kiwa yatoh waka jylla yong i, ka BJP Meghalaya deilang wa oo u yieñ yatylli ki.
Kamtæ da ong u wa lada toh iwa jia ya u Father Sten lane kiwon kiwon ki kaam, neiliang yong oo da klam bait u wei da lai rah leh cha kiwa yahkhmat dooh ka Party. “Nga ym em O iyi iyi wow murieh namo ka thong wa cha kylla wei ym em hi leh kynran dien O na iwon iwon i kaam kiwa yatoh waka jylla kamjooh ki bru yong ka,” da ong u Sanbor.
Da kdaw u leh ya ka CAA, deiwa ong wa toh du oo samen u MLA na waroh kawi ka thaaiñ Northeast uwa da lai dei bru cha ka sorkar pyrdi yow dawa u pynlait ya ka CAA na ki thaw wa em hapoh ka Sixth Schedule. Wei da yieñ u deilang wa waroh ki lok wa em hapoh ka MDA ha iwon iwon i eh i khoo deiwa khlem chet kylla ya ka Party yong oo wa i yahkhmat u Conrad Sangma.
U Sanbor da beiñ u leh yei klam u A.L. Hek yow pynchitom ka Party ya oo iwa da pynyoo wa mynjur u yeiwa chah klam pyrchah ka BJP.
Da ong u leh wa ka BJP toh kawa chi lok waka MDA wei da kyrchaan yei chongsuk chongsaiñ ha ka imlang sahlang kamjooh hapyrdi waroh ki niam ha Meghalaya.
Kamtæ u Sanbor da ong u wa u A.L. Hek wa kiwi lada kamni da mynjur ki wa ka BJP man ko pyrchah ya ki Christan tangwa ileh won ya krehlang ki waka BJP?
Chooh chooh da ong u wa ka India toh ka ri wa em ka sorkar pyrdi wa ki sorkar jylla kiwa em jar jiar i eh i khoo kamtæ ym ye u pynbaad ya ka BJP ya waroh ini wei ka riti synchaar ka ri leh toh kawa e hok ya waroh wow jied ki ya kawon kawon ka niam.
Kamtæ da pynkut u deiwa ong wa ym em iyi iyi wa kwah u pynmong namo i ksoh nood wa kiwi kiwa emlang hapoh ka sorkar. “Nga yajan bha O waka UDP bar ya iwa tip ki bru, wei sñiawngooh O ya u (T) Dr. Donkupar Roy uwa da man kam u khloor wa yahluti ya nga ha ki kaam seiñhima sima. Waka NPP da em i sooh thied nadooh ki por u (T) Purno A Sangma, uwa da man kam uwa sikai ya nga yow man uwa jop ha ki kaam seiñhima sima”.
“Sa chisien da paan maap O ya ini wa jia wei iwa klam O toh yow pynyoo wa ka BJP wym em leh chiliang ko ya kiwon kiwon ki niam wei ym em kyrchaan ko leh ya kitu ki kaam wa pyrchah ya ki Christan wa kiwi de,” pynkut ka kyrwoh na u Sanbor Shullai.
Puræ leh: Dawa ka UDP wow pynchitom ya u Sanbor wa pyndooh burom u ya u Metbah
