Kiwa mihkhmat ka jaitbru Hmar wa Kuki kiwa chong wa sah ha Shillong da paan kyrchaan wa i yada na u Montri Rangbah ka jylla, u Conrad K Sangma khnang wow lait na iwon iwon i jia wa ktah ya i suk i saiñ hadien wa mih i kynaad iwa da mih ha ka jylla Manipur nadooh ka 3 tarik uni u bnai hapyrdi ki jaitbru Meitei wa Kuki.
U Montri Rangbah da ong u wa da phah u ya u Deputy Commissioner wow leh yeiwa emkaam, hadien wa kini ki heh kiwa na Manipur da paan yarap ki na oo neibynta kitu kiwa phet wiar kiwa wan sah chipor ha Shillong.
U Conrad da ong u leh wa kini ki heh ki jaitbru Manipur da kyntu ki wow yaklam u wa ki bor sorkar ha Delhi wow wanrah biang ya i suk i saiñ ha kani ka jylla, wei neiliang u Conrad da pyntip u wa daw yaklam u leh wa ka sorkar pyrdi.
